Во далечната 1920 година на италијанскиот остров Капри на готвачот Кармин Ди Фјоре му било наредено да спреми торта за тројца американци. Кога чул дека во прашање се членови на италијанската мафија на Ал Капоне, готвачот толку испаничил што заборавил да стави брашно во тортата. Тоа, секако, не смеел да го кажи и ја послужил таква каква што била. Гостите се воодушевиле од вкусот. Така, оваа торта со грешка стана една од најпознатите торти во Италија.

1. Бадемите потпечете ги и сомелете ги крупно. Чоколадото и путерот стопете ги. Мешајте повремено додека се ладат за да не се направи кора.
2. Одвојте ги белките и жолчките. Белките изматете ги цврсто со прстофат сол.
3. Жолчките со шеќерот и ванилата се матат додека згуснат. Се додаваат стопените путер и чоколадо и се мати со намалена брзина додека убаво и цврсто се соединат. Се додава на крај и румот да се соедини.
4. Бадемите ги додаваме рачно. Мешаме со шпатула. На крај полека и постепено го додаваме снегот од белки, мешајќи едносмерно за да се задржи воздухот.
5. Намастете калап на откопчување 24, со путер насекаде, а на дното ставете и пек хартија. Истурете ја смесата за торта во него и печете ја на 170С 40 минути. Имајте во предвид дека оваа торта во средината останува влажна. Тестот со чечкалица овде може да го замените со благо притискање на кората и осет на раката дали е печена тортата. Всушност, на оваа температура и време е доволно да се испечи тортата. Доколку сметате дека рерната ви е послаба, продолжете уште 5-10 мин. Печење и/или завршете со тоа што ќе ја оставите некое време во исклучена рерна. Печената торта откако ќе излади наросете ја со шеќер во прав.
6. Оваа торта не трпи друга декорација. Шеќерот во прав комплетно ја надополнува нејзината фантастична арома.
Кога сме кај аромата, румот како арома не е задолжителен. Ако ви е јако измешајте го со вода или ставете некој ликер, како амарето на пример.

Фотографиите во овој рецепт се авторски фотографии.

Лиценца: Криејтив Комонс - Наведи извор - Некомерцијално - Сподели под исти услови