Еве една брза идеја за убава празнична торта, лесна за подготовка, а уште полесна за јадење. Подготовката е следна.

1. Во сад на оган ставете 150 мл. млеко со 250 гр. шеќер. Полека да се загрева додека да се растопи шеќерот. Во друг сад на страна растворете ги желатините во 100 мл млеко. Така растворениот желатин додајте го во провриеното млеко и шеќер. Убаво промешајте и оставете да се излади.

2. Во друг сад за матење ставете го шлагот со преостанатите 300 мл ладно млеко и матете со миксер додека да ја добиете потребната густина. Во изматениот шлаг додајте го и изладеното млеко со желатин. Убаво соединете ја смесата со миксер и поделете ја подеднакво по 1/3 во 3 сада. Во првиот сад додајте ги мелените ореви, во вториот мелените млечни наполитанки и во преостанатиот сецканата сушена брусница.

3. Соодветен длабок сад (калап за торта или куглоф) обложете го со најлонска фолија (за покасно полесно да ја извадите тортата) и редете слој по слој од изматените шлагови. Јас најпрво го ставив шлагот со мелени наполитанки. Оставете го садот во замрзнувач да се стегне 15 мин пред да го нанесете вториот слој шлаг. Во средината додадете го шлагот со брусница. Пак оставете 15 минути да се стегне и на крај ставете го тој со мелени ореви. На крај наредете ги пишкотите во садот. Оставете ја така готовата торта најмалку 2 часа во замрзнувач убаво да се стегне.

4. Во сад на пареа (или на тивок оган) ставете го белото чоколадо да се растопи. Додајте и путер за покасно да не ви пука глазурата кога ќе сечете парчиња од тортата ( јас овој пат заборавив). Прехрамбената црвена боја (ако е во прав), растворете ја со неколку капки вода и додајте ја во растопеното чоколадо. Промешајте да се изедначи бојата. Изладената торта превртете ја врз чинија и врз неа истурете го растопеното чоколадо.. Украсете по желба со кокос, мрвици, чоколадни топчиња или новогодишни фигури изработени од фондан смеса. Оставете и глазурата да се стегне и сечете парчиња со големина по желба

На здравје

Фотографиите во овој рецепт се авторски фотографии.

Лиценца: Криејтив Комонс - Наведи извор - Некомерцијално - Сподели под исти услови