Нема врткање околу шпорет, рерна, рингла. Зеленчукот го ставаме во апаратот за готвење со топол воздух, го превртуваме на половина печење, за да ни е испечен од сите страни подеднакво и си правиме пинџур. Се преродив летово со апаратов...Не чекам додека да ми се загрее рерната, не му стојам на зеленчуков додека се пече на рингла...А бре мерак да ти е само пинџур да јадеш! Инаку нели се Петровденските пости во тек, значи не знам колку пати направив пинџурче!

Подготовка
1. Пиперките и доматите ги печеме во апаратот за готвење со топол воздух.
2. Тиквичката ја миеме и ја сечкаме на кругови, Исто така ја печеме во апаратот.
3. Лукчињата ги сечкаме на многу ситни коцкички и магдоносот го сечкаме.
4. Испечените пиперки ги лупиме им ги отстрануваме семките и ги сечкаме на мали парченца. Исто и доматите, печени, излупени и исечкани.
5. Печените тиквички ги блендираме.
6. Сите состојки ги ставаме во тава, вклучувајќи го и лукот, зачинуваме и смесата ја упржуваме на масло. Кон крајот на пржењето го додаваме магдоносот.

Забелешка
Ако сакате можете да го загреете маслото и само да го прелиете сечканиот зеленчук со врелото масло, насекаде. И така го подготвувам и превкусно е!

Фотографиите во овој рецепт се авторски фотографии.

Лиценца: Сите права се задржани