Секој година за Божик подготвуваме пача јас и мојот сопруг. Морам да признаам дека ми помага бидејки правиме голема количина, а има многу работа.

Месото може да биде по ваш избор, но основата мора да бидат свински нозе. Количината е по ваша желба и можности. Некои ја прават и со свинска глава, но јас не сум пробала и не знам дали убаво би се стегнала.
Свинското месо го миете убаво, го сечете на парчиња за поубаво да се извари, коските ги кршите за да им излезе убаво желатинот. Свинските нозе исто така да се пресечени вдолж убаво, бидејќи тие се основата за да стегне течноста. Остатокот од месото е за да биде вкусна пачата, да биде целата на месо, оти на крајот сите коски, кожинки и мрсни делови ги исфрламе, останува само месото ммммм...

Значи основно правило, го ставате месото во тенџере (ние правиме во големата шерпа за ајвар која собира преку 20 литри течност), турате вода колку што е тенџерето, го ставаме на оган и оставаме да се вари со часови. Бидејќи правиме огромна количина, кај нас вареше 11 часа. Или додека да остане малку повеќе од третина од целата течност. Во варењето се тура сол, а вода не се дотура никако.

Кога е сварено, го тргаме тенџерето од оган, го вадиме на страна месото и го чистиме од кожинки, коски, сланинки и останати мрсни делови. Останува само чистото месо кое го кинеме на ситни парчиња (може и да се сечка, но толку преварено и со раце се работи).

Течноста ја прецедуваме преку ситна цедилка, ја зачинуваме со сол и толчен лук по желба. Не плашете се да ставите повеќе лук, пачата трпи. Јас ставив три главици големи. Ако стравувате дека месото ви пуштило многу мрснотија, тенџерето ставете го на ладно (во мојот случај на тераса) за десет минути мрснотијата ќе побели и ќе се издвои горе врз течноста и само соберете ја со лажица.

За крај, течноста рамномерно ја распоредувате во тањири ( во мојот случај во 20 тањири) Потоа во секој тањир рамномерно ставате од парчињата месо, така подготвените тањири ги пренесуваме на ладно да се здрват.

Бидејќи колку да ја отстранувате мрснотијата најгоре ќе има малку бела мрежичка, кога ја сервирате, сервирајте ја превртена во плитка чинија, да биде лична проѕирна, сјајна.

Со неа се пие ракија.

На здравје!

Фотографиите во овој рецепт се авторски фотографии.

Лиценца: Криејтив Комонс - Наведи извор - Некомерцијално - Сподели под исти услови