Младенчиња - колачиња за Младенци (посно)
На 22 Март секоја година се слави православниот празник Младенци. Тоа е убав празник кој го означува почетокот на Пролетта и е посветен на љубовта и младите брачни парови во првата година од нивниот брачен живот. Обичај е на овој ден да се прават слатки колачиња со мед за да им биде бракот сладок. Бидејќи е период на пости најчесто се овие колачиња посни, а бидејќи е ден на 40 Маченици, се прават 40 колачиња. На овој ден домаќинката треба да припрема различни јадења за да се покаже пред кумот и гостите
Јас минатата година славев Младенци и случајно сретнав слики од рецептов во фолдер, па да го постирам за овогодишните славители на овој празник. И не знам дали е правилно, но целата трпеза лани за Младенци ми беше спремана посна, иако во мода е сите да служат мрсни салати и месо.
Да се вратиме на рецептот
Од брашното, квасецот, водата, шеќерот, маслото, солта и ренданата кора од портокал замесете тесто. Оставете го да одстои околу 1 час за да го дуплира волуменот. Рассукајте тесто со дебелина од 5мм и со чаша формирајте 40 колачиња. Колачињата со свежо гранче босилек издупчете ги на неколку места и оставете ги уште малку да стасаат. Печете ги околу 20 минути и додека се уште топли премашкајте ги со мед и декорирајте ги со суво грозје во средина.
Лиценца: Криејтив Комонс - Наведи извор - Некомерцијално - Сподели под исти услови
Светих Четрдесет мученика у Севастији
Сите овие беа војници во римската војска, но тврдо веруваа во Господ Исус. Кога настана гонење во времето на Ликиниј, ги изведоа на суд пред војводата, а тој им се закани дека ќе им ја одземе војничката чест. На ова еден од нив, Свети Кандид, одговори: „Не само војничката чест туку и телата земи ни ги; нам не ни е ништо помило и почесно од нашиот Бог Христос“. По ова војводата им нареди на слугите да ги каменуваат овие светии. Но кога слугите фрлаа по нив камења, камењата се враќаа сами и паѓаа врз тие што ги фрлаа, па луто ги изудираа. Еден камен му падна на војводата в лице и му ги скрши забите. Мачителите, лути како ѕверови, ги врзаа светиите и ги фрлија во тамошното езеро и поставија наоколу стражари за ниеден да не излезе од водата. Имаше силен мраз, езерото мрзнеше околу телата на мачениците. За да бидат маките посилни, мачителите загрејаа и осветлија бања покрај езерото близу до страдалците, за тие гледајќи ја некако да се подлажат и да се одречат од Христа, а да ги признаат римските идоли. И навистина, еден се опрелести, излезе од водата и влезе во топлата бања. Но ноќта падна една необична светлина од небото, па ја загреа водата во езерото и телата на мачениците, а со оваа светлина од небото се спуштија триесет и девет венци врз нивните глави. Ова го виде еден од стражарите на брегот, па се соблече, го исповеда името на Господ Исус Христос и влезе во езерото за самиот да се удостои со четириесеттиот венец на предавникот. Врз него навистина слезе тој последен венец. Утредента сиот град се изненади кога ги виде мачениците живи. Тогаш злобните судии наредија и ги претепаа, а телата им ги фрлија во водата за да не ги земат христијаните. На третиот ден Светите маченици му се јавија на тамошниот епископ Петар и го повикаа да ги собере од водата и да ги извади нивните мошти. Епископот излезе ноќе по темнина заедно со својот клир и по водата видоа како светат моштите на мачениците. И секоја коска што беше одвоена од нивните тела исплива на површината и светеше како свеќа. Ги погребаа чесно. Нивните души отидоа кај Господ Исус, намачен за сите нас и воскреснат со слава. Чесно пострадаа и стекнаа непропадлива слава во 320 година.