Мафини со компири, пармезан, нане и семки од тиква и сончоглед

Морам да кажам дека ова ми еден од омилените рецепти кои сум ги смислил во последно време.

Според коментарите на оние на кои веќе сум им го кажал и кои ги направиле овие мафини можам да речам и еден од моите најуспешни лесни рецепти.

На почеток излупете ги компирите, исечете ги на коцки и сварете ги. Кога ќе бидат сварени ставете ги во цедалка убаво да се исцедат и изладат.

Во поголем сад за матење изматете ги јајцата со половина лажичка сол.

Додадете ги ситно сецканите нане и младо лукче и повторно промешајте.

Додадете ги изладените и исцедени коцки компир. Матете со миксер додека не добиете еднолична смеса. Слободно може да оставите помали грутчиња од компирот.

Додадете ги јогуртот и маслиновото масло и со миксер матете до убава глатка смеса.

Просејте го брашното низ сито и во него измешајте го прашокот за пециво.

Со постојано матење со миксер во смесата додавајте по малку од мешавината од брашно и прашок за пециво. Треба да добиете густа, но течна смеса.

Изрендајте малку пармезан, а семките од тиква и сончоглед малку потпечете ги во Делимано тавче без никакви додатоци.

Во калапи за мафини, претходно премачкани со маслиново масло и набрашнети ставате од смесата, но не до горе. Оставете приближно половина сантиметар.

Во секое калапче наросете малку рендан пармезан и од потпечените семки.

Ставете ги мафините да се печат 50-тина минути, во претходно загреана рерна на 150 степени. На почетокот на печењето мафините ќе нараснат, но потоа полека ќе ја добијат финалната форма и текстура која е крцкава од надвор, а мека внатре.

Кога мафините ќе бидат печени извадете го садот од рерна и оставете го 15-тина минути за да се стегнат мафините пред да ги вадите од калапот.

Извадете ги на решетка или платнена крпа за да не кондензираат и да не биде долната страна мокра од самата кондензација.

Послужете ги со шолја јогурт за појадок или чаша бело вино за вистинско уживање.

На здравје.