Здрави Чоко-Урма Бомбици со Сусам (посно)

Подготовка

1. Урмите ги потопуваме во топла вода (околу 10-на минути додека да завршиме со пропржување на сусамот), па потоа ги цедиме од водата со помош на цедалка, без притоа да ги стискаме.
2. Потоа го пропржуваме сусамот во сува тава на ниска температура со постојано мешање да не загори.
3. Од пропржениот сусам ставаме во електричен сецко 5 г.л. (45гр) и го иситнуваме, па ги додаваме урмите, исецкани на пола, и продолжуваме со нивна обработка до хомогенизирање.
4. Добиената смеса ја префрламе во длабок сад, го додаваме чоколадото (стопено на пареа) и екстрактот од рум и соединуваме.
5. Оваа смеса ја оставаме на 10-на минути во фрижидер (или 5 мин во замрзнувач) да се стегне, па ги формираме бомбиците (јас секоја со тежина од по 15 гр). Оформените бомбици ги увалуваме во останатиот дел од пропржениот сусам.

Забелешка - Од оваа доза мене ми испаднаа 16 бомбици со таа големина. Вкусот им е ептен чоколаден, воопшто не се познава дека има урми.

На здравје!