Чили Кон Карне во многу варијанти. Јас спремив по рецепт на Рудолф за кој верувам дека многумина го виделе, го спремив, останавме презадоволни, па си реков нека го и тука, зошто само да го има кај Рудолф. 
 
- На маслиново масло во подлабока тава или касерола, ставете кратко да се пропржи ситно сецканиот кромид и лук. Пробркувајте. Додадете го мелениот ким, нека се пржи исто така кратко време по што ќе ги додадете исчистените од семето Чили пиперчињата, а ако имате поголема пиперка, тогаш ставете една, исецкајте ја и додадете кај кромидот и лукот и нека продолжи да се пржи. По ова кратко пропржување додадете го меленото месо. Измешајте и пробркувајте додека сето тоа заедно се пржи.
- Додека се пржи исчистете ги од семето зелената, црвената и жолта пиперка, исецкајте на не толку големи парчиња, додадете кај месото. Нека продолжи повторно сето ова да се пржи. Додадете го пирето од домати. Измешајте и оставете да крчка на огнот, а за тоа време исецкајте го доматот, и него додадете го. Додадете ја и коцката, говедска или зеленчукова. Сето ова сега нека се вари или крчка околу 10 мин.
- Исецкајте ги бананите на кругови, додадете ги и нив. Додадете го и сварениот кафен грав.
- Веќе ги имате ставено во касеролата сите состојки... пробајте и овкусете со сол или сув зачин. Поросете и бибер. Нека крчка околу 8 мин. Тргнете од огнот.
Вака спреманото Чили Кон Карне сервирајте или самостојно или со додаток на ориз било интегрален било бел ориз, а секако дека може и со тестенини.
Напомена
- Јас имав мали Чили пиперчиња, ставив околу 8 (за да ми биде попикантно).
- Сварив кратки макарони, (ме потсети на Паста Фажол), супер, супер комбинација, кој сака пикантно - ке биде презадоволен.
- Пиперките ми беа точно така - црвена, жолта и зелена и беа од бабурите кои се меснати. Комбинација од мерак.

Фотографиите во овој рецепт се авторски фотографии.

Лиценца: Сите права се задржани