Мои рецепти, со зададените теми на натпревар постојано не инспирирате да создаваме нови деликатеси во нашите кујни. Така произлезе и овој вкусен чизкејк. Освен што чизкејковите ми се фаворит помеѓу десертиве, секој нов рецепт е сепак ново доживување и посебна радост за непце. Уживајте и вие во оваа вкусотија!

Подготовка
1. Јајцата со шеќерот ги матиме со миксер. Откако ќе се згуснат додаваме брашно, пециво и масло. Промешуваме и смесата ја ставаме во калап (претходно намрсен и подмачкан со масло) бр.22-24 да се пече на 180 степени околу 10 минути или пробуваме со чепкалка дали е печен.
2. Бадемите ги потпекуваме во рерна или на рингла, па ги мелеме. Заедно со 250 мл слатка павлака, шеќерот во прав, маскарпонето и ванила екстрактот ги соединуваме со матење, до згуснување..
3. Желатинот го ставаме во 20-30 мл вода да се раствори, па го ставаме на рингла да се растопи. Го додаваме постепено кон смесата со маскарпоне и интензивно со миксер матиме да се соедини.
4. Оваа смеса ја делиме на два дела. Првиот дел го ставаме врз печениот пандишпан, оставаме да се стегне малку во замрзнувач. Во втората смеса рендаме 50 гр црно чоколадо, па откако ќе се стегне првиот дел од филот го нанесуваме овој фил со чоколадо. Оставаме во замрзнувач да се стегне.
5. Чоколадото заедно со слатката павлака ги ставаме на средна температура да чоколадото се стопи и се соединат. Со чоколадната глазура го прекриваме чизкејкот.
Оставаме да се лади во фрижидер.
7. За бомбиците ги соединуваме сите состојки и формираме бомбици со големина по желба.
8. Откако чизкејкот ќе се излади и стегне, го вадиме обрачот внимателно. Прво со тенко ноже поминуваме помеѓу страниците па го тргаме обрачот.
9. Го украсуваме со карамел крем, бомбиците и крокант од лешници.

Забелешка
Како подлога може да искористите и готова кора, ако не сакате да печете пандишпан. Доколку немате купено маскарпоне и карамел крем и сакате домашни подготовки, рецепт за домашно маскарпоне и карамел крем имате овде во моите рецепти.

Фотографиите во овој рецепт се авторски фотографии.

Лиценца: Сите права се задржани