Драги мои пријатели, еве ме мене повторно со еден убав јубилеј.
Некако неосетно се нижеа ден по ден, рецепт по рецепт....
Среќна сум што успеав да ви го доловам мирисот од мојата кујна, пишувајќи рецепти, поткрепени со фотографии.
Исто така среќна сум што на ова место сум во друштво со вљубениците во добра, домашно подготвена храна, со новите стекнати пријателства, со моите фанови кои ме следат....
Па еве изборот за овој јубилеј беше токму оваа Торта киндер буено, за која не е потребно печење, туку е потребно можеби повеќе време и трпение за подготовка
Да напоменам дека тортата е навистина захтевна, иако некако изгледа лесна за подготовка.
Едно мало невнимание на 2-3 места ми ги уништи кревките наполитанки.
Тортата е со одличен изглед и вкус.
Јас сум презадоволна од крајниот резултат, а вие погледнете и оценете.
Воедно тортава беше и роденденска во нашето семејство.

Начин на подготовка.
Потребен ни е лимен калап со следните димензии - ширина 10цм, висина 7цм, должина 35цм.
Калапов го правев кај лимарот во Неготино, бидејќи не успеав во продажба да најдам баш ваков калап. Димензиите јас си ги поставив, од причина што сметав дека оваа големина ќе биде доволна за да го доловам она што го замислив.
Врз калапот ставаме прозирна фолија која многу танко ја премачкуваме со масло.
Сега од цврст картон кроиме мали парченца како на сликата.
Ги спојуваме меѓу себе со шербет или со растопено чоколадо,
Никако немојте да ги лепите со лепак, бидејќи може тортата да мириса на лепакот.
Нивната ширина треба да биде од 1,5-2 цм.
Така подготвени ги завиткуваме во прозирна фолија.
На долниот дел ги премачкуваме со растопено млечно чоколадо.
Ги поставуваме рамномерно на 2 места во калапот.
Оставаме така еден час за да се стегнат.
Сега цел калап го премачкуваме со растопеното чоколадо.
Земаме од наполитанките, ако има потреба ги кроиме по потребната димензија и ги нанесуваме рамномерно во целиот калап.
Исто ставаме наполитанки и кај двете препреки.
И нив ги премачкуваме со чоколадо. Значи целосно наполитанките треба да бидат премачкани со чоколадо за да ја задржат крцкавоста.
Сега го подготвуваме полнењето.
Во нутрибулет ставаме 50 мл млеко, лешниците и нутелата.
Миксаме за да добиеме мазна густа смеса.
Оставаме на страна.
Остатокот од млекото го ставаме во касерола, додаваме ванила, шеќер, густин и три жолчки.
Соединуваме убаво и вариме до згуснување.
Со повремени мешања го ладиме кремот.
Тука го додаваме кремот со лешници и растопеното бело чоколадо.
Соединуваме убаво.
Оставаме на страна.
Сега со миксер го матиме маскарпонето.
По желба додаваме шеќер во прав.
Го соединуваме со претходната смеса.
Со овој крем го полниме калапот.
Одозгора редиме повторно наполитанки.
Врз нив нанесуваме растопено млечно чоколадо..
Вака подготвена тортата ја оставаме во фрижидер 2-3 часа.
Потоа ја превртуваме на послужавник.
Внимателно ги вадиме преградите кои ги ставивме на почеток.
Сега земаме еден послужавник.
На него редиме три чаши со отворот надолу.
Врз нив ја поставуваме тортата.
Во еден сад над пареа растопуваме млечно чоколадо и малку масло.
Обилно ја прелеваме тортата со чоколадото.
Оставаме да се исцеди вишокот на чоколадо.
Нежно правиме шари со црно чоколадо.
Ја преместуваме тортата на послужавник
Сечеме парчиња и послужуваме.
На здравје
Предлагам доколку имате ваков силиконски калап, него да го користите за подготовка на тортата.

Фотографиите во овој рецепт се авторски фотографии.

Лиценца: Сите права се задржани