Рецепт од турската кујна. Се служи за појадок, но јас би го предложила и како главно јадење. Брзо се подготвува со едноставни состојки а вкусот е одличен.

Вклучете ја рерната да се загрева на 175 степени.
Кромидот исечкајте го на не многу тенки полукругови. Лутата пиперка исечкајте ја на лентички, а суџукот излупете го и него исечете го на полукругови. Ставете сето тоа во тавче (по можност огноотпорно), додадете 2-3 лажици маслиново масло и пржете 10-тина минути. Пиперките исечкајте ги на ленти и додадете ги и нив да се пржат околу 5 минути. Ставете ги доматите и оставете така да крчка околу 5 минути, повремено промешувајте. Насолете и набиберете на вкус. Додадете го исечканиот магдонос, промешајте и со помош на лажица направете дупки во смесата и во секоја од нив скршете по едно јајце. Ставете да се печи 10-12 минути или во зависност од тоа колку тврдо сакате да биде зготвено јајцето. Извадете од рерна, наросете по желба со магдонос и послужете топло со топол леб.

Напомена
Доколку немате огноотпорно тавче, тогаш откако ќе ги ставите јајцата поклопете го тавчето со капак, намалете температурата на ринглата и пржете така додека да се готови јајцата.

Фотографиите во овој рецепт се авторски фотографии.

Лиценца: Сите права се задржани