Ха! Замислете, насловот е целиот рецепт!
Колачињава се прават за час, ги снемува уште побрзо, а потребни ви се само три намирници - банани, овес (односно овесни снегулки) и мед.

Пуштете ја рерната да се загрева на 180 степени. Испасирајте ги бананите без да претерувате – уште подобро ако останат грутчиња. Додајте 2 лажици мед и една шолја овесни снегулки.
Измешајте убаво да се соединат и со лажица ставете на плех прекриен со хартија за печење.
Печете во загреана рерна околу 15 минути.
Толку!

Забелешки
* Не очекувајте крцкави колачиња – надвор малку ќе бидат потпечени, но внатре се влажни и меки.
* Зависно од големината на самите колачиња но и на бананите, од оваа доза излегуваат околу 6-8 колачиња. Затоа јас веднаш удвоив, хаха.
* Не претерувајте со количината зашто најубави се тазе и следниот ден, ако отстојат премногу веќе не е тоа тоа. А бидејќи се така лесни за правење може секогаш набрзина да си направите нова тура.
* Ако сакате малку помазна структура, пред да ги помешате овесните снегулки може да ги измиксате во блендер (на суво) ама само кратко - не да ги направите како брашно - само колку да ги иситните малку.
* Слободно може да експериментирате и со парченца чоколадо, суви овошја, бадеми, лешници и слично...
* Бидејќи се здрави колачиња претставуваат одличен појадок или ужинка!

На здравје!

Фотографиите во овој рецепт се авторски фотографии.

Лиценца: Криејтив Комонс - Наведи извор - Некомерцијално - Сподели под исти услови