Торта која ако сакате ќе и спремите глазурата, ако не едноставно само завршете со филот- декорирајте. Јас ќе ја напишам и глазурата доколку некој сака да ја спреми, но ова што го гледате на фотографијата не е полиена глазура.

Пандишпан
- Ставете во сад јајцето, шеќерот и медот и матете додека смесата не стане пенеста и светла. Продолжувајки да матите ставајте една по една од жолчките и матете се додека не добиете густа пенеста смеса.
- Измешајте ги брашното, густинот и какаото, ставете на врв на ножот пециво, просејте - целото ова додајте кај сматената смеса и со шпатула бркајки одозгора према доле - внимателно измешајте ги состојките да се спојат.
- Истресете ја добиената смеса во лесно подмачкан и набрашнен калап размер 20 см. и печете на 175 степени претходно загреана рерна околу 20 мин. Извадете од калапот, оставете на решетка да се олади.

Фил
- Во касерола ставете го кондензираното млеко и накршена чоколада и загрејте да се млекото загрее и чоколадото почне да се топи. Тргнете од огнот, додадете го путерот и енергично со лажица бркајте додека не се целосно стопи чоколадата заедно со путерот и добиете една фина хомогена смеса која е мека и сјајна. Оставете на собна температура да се потполно олади. Во оладениот крем додадете го крем сирењето кое претходно со жица сте го изматиле.

Глазура (ако одлучите ја полиете со глазура)
- Загрејте ја слатката павлка која само треба да се добро загрее без да дозволите да проврие, додајте насецкана чоколада, гликозниот сируп и путерот. Бркајте се додека не се се стопи и спои. Оставете да се олади на собна температура.
Формирање на тортата
- Оладениот пандишпан исечете го на три дела во дебелна од 1 см.
- На тацната на која ќе стои тортата ставете го првиот дел, попрскајте го со чоколадно млеко во кое сте додале екстратот од ванилата или пак некој друг ликер кој ви е омилен, премачкајте го сосема во тенок слој со мармаладот од кајсии (прво го загрејте да стане течен). Врз мармаладот ставете половина од чоколадниот фил. Врз филот ставете другата кора - чоколадно млеко, мармаладот - другата половина од филот. Вака формираната торта ставете ја во фрижидер или замрзнувач да одстои околу 20 мин . (полесно се довршува целосно тортата)
- Извадете од фрижидерот, премачкајте ја сега целосно тортата со тенок слој од веќе оладената глазура. Оваа постапка е потреба како би се залепиле трошките кои се создаваат при сечењето на деловите. Вратете ја повторно во фрижидерот околу 10 мин. за да се стегне глазурата.
- Остатокот од глазурата сосема малку ја загрејте. Не смее да биде многу мека и течна како би се полесно разлила и порамномерно. Треба да биде толку течна колку да може сама да се разлие по целата торта и да сама паѓа по зидовите на тортата. Значи, загрејте ја, излијте ја на средината и распоредете со шпатула или нож на целата површина, оставете нека сама тече по страните.
- Вратете ја во фрижидер и нека стои таму до самото послужување.
СОВЕТ
- Во рецептот за оваа торта во пандишпанот не е потребно пециво, ама заради сигурност јас ставив на врв на ножот. Ако се добро сматат состојките и подоцна во целата постапка додека се брка брашното во смесата внимателно се работи за да не се истисне воздухот, пандишпанот фино ќе се надигне исто како да сме ставиле пециво. Значи нема бркање на смесата во круг туку одозгора надолу.

- Напишав рецептот оригинал како го постави Дијана. Јас правев со зголемена количина на сите состојки за пандишпанот и го печев во правоаголна форма, пресеков на два еднакви дела по должината - Останатото се исто со тоа што филот ми е за еден пат повеќе бидејки не ставив глазура. (лесно си завршив со трошките и лушпите)
- Додатно декорирајте ја како сакате вие тортата. Јас сум повеќе по едноставноста и трошки, лушпи чоколадни, најлесно ми е...
- Ќе ме прашате за Гликозата - во секој специјализиран маркет за торти и колачи се продава гликоза, а има рецепт како и да си ја сами направиме во домашната работилница. Арно ама за тоа потоа, можеби и ќе го напишам рецептот.
- Многу изнапишав , да се уплаши човек, но кога ќе прочитате кќе видете дека само јас тоа ептен сум се зазборела овде... не е тешко да се спреми.
Колку повеќе стои тортата толку е посочна и помека. 
- Глазурата бидејки е една од помеките видови глазура, пожелно е (доколку сте ја така спремиле) да при сечењето користите тенок остар голем нож кој при секое сечење ќе го ставете во топла вода и потоа сечете.
Додатни фотографии нема.

Фотографиите во овој рецепт се авторски фотографии.

Лиценца: Сите права се задржани