Сакајќи да го избегнам тестото од бело брашно, по неколку комбинации на вкусови дојдов до овој рецепт. Дефинитивно ни е омилен, па често е на наше мени. И да не сте љубител на леќа, пробајте го затоа што вкусовите се избалансирани и не се ни чувствува вкусот на леќа.

Подготовка:

1. Во длабок сад ја ставаме леќата претходно измиена со ладна вода. Додаваме вода да се прелие и ја оставаме околу 10 часа да отстои.
2. Просото го миеме со ладна вода и го ставаме во сад на оган, додаваме вода да се покрие и го вариме на средна температура со повремено мешање.
3. Во блендер го ставаме кромидот исечен на четвртинки и чешнињата лук, блендираме. Во блендерот ги додаваме отстоената леќа која ја цедиме од водата. Блендираме. Го додаваме свареното просо, блендираме.
4. Смесата ја ставаме во длабок сад. Ги додаваме солта, црниот пипер, мелениот сусам, меленото ленено семе, мелените семки од тиква и маслиновото масло. Мешаме со лажица. Во смесата го додаваме овесното брашно. Промешуваме.
5. Во плех обложен со хартија за печење ја распределуваме подеднакво смесата. Печиме во загреана рерна 10 минути. Го вадиме плехот и врз тестото премачкуваме со доматно пире и го додаваме ориганото. Го додаваме ренданиот кашкавал, па врз него ги редиме сецканите домати, пиперки и маслинки. Печиме на 180 степени уште 10-15 минути.

Фотографиите во овој рецепт се авторски фотографии.

Лиценца: Сите права се задржани