Оваа варијанта на фокача е посна, но исто така и доста здрава, богата со семки и семиња, богата со влакна за фит форма.
Најпрво квасецот со шеќерот го растворуваме во малку млака вода. Откако ќе почне да стасува, се додава маслиново масло и водата, па се истураат овесните трици, интегралното брашно и белото брашно. Сето тоа се меша со лажица за да се добие хомогена смеса. И на крај се додаваат семките од сончоглед и тиква, кои предходно доколку сакате може да ги потпечете за подобар вкус, а може и непечени семки. Со тоа се добива многу меко тесто кое не се меси со рака туку само со лажица. Се остава тестото да стаса 1 час. Откако ќе стаса тестото се истура полека внимателно во правоаголен плех, подмачкан со маслиново масло. Се распоредува тестото рамномерно со отприлика 2 см дебелина и се дупчи со прст насекаде по тестото. Потоа тестото го премачкуваме со маслиново масло, па ги редиме кругчињата зелена маслинка и шампињоните. На крај ја посипуваме фокачата со оригано, интегрален сусам и ленено семе.
Вака приготвеното тесто се остава да отстои уште 1 час и потоа се пече 25 минути на темепература од 200 степени.
Испечената фокача се покрива со кујнска крпа и се остава да олади, а потоа се служи.

Фотографиите во овој рецепт се авторски фотографии.

Лиценца: Криејтив Комонс - Наведи извор - Некомерцијално - Сподели под исти услови