Палењето на трупец е божиќна традиција во Европа која датира уште од средновековното време. Луѓето внимателно избирале новогодишна елка, ја носеле во својот дом и го ставале крајот во огнот. Целото дрво било изгорено и огнот горел цел ден. Нешто слично како традицијата на горење на дрва кај нас за Коледе.

Позната и како Бûцхе де Ноëл, тортата е направена врз основа на таа стара традиција. За наша среќа, ова дрво нема да го изгориме - туку ќе го јадеме! Во основа, тоа е ролат од чоколаден пандишпан кој е исполнет со крем и покриен со чоколаден ганаш и направен да изгледа како трупец.

Верзијата што ја споделувам со вас денес е прекрасно нежна чоколадна торта исполнета со шлаг со маскарпоне и покриена со чоколаден ганаш. Украсувањето е по желба, останува на вашата креативност и имагинација.

Подготовка
1. Загрејте ја рерната на 180 степени. Обложете го плехот со хартија за печење (задолжително).
2. Во чинија измешајте ги брашното, какаото, прашокот за пециво и солта и оставете ги на страна.
3. Во поголем сад изматете ги жолчките и шеќерот, изматете ги добро да се соединат. Додадете ја павлаката, растопениот путер и екстрактот од ванила и изматете додека убаво не се соедини. Додадете ги сувите состојки и нежно изматете додека добро да се соединат, а потоа оставете ги на страна.
4. Ставете ги белките во голем сад и изматете ги со голема брзина додека не се формира цврста пена. Истурете околу 1/3 од белките во другата смеса и нежно измешајте со шпатула. Повторете ја постапката уште 2 пати. Не мешајте силно. Сакаме да ја задржиме воздушестата структура на целата смеса.
5 Истурете ја смесата во плехот и убаво распоредете ја. Печете 10-12 минути на 180 степени или додека горниот дел од колачот не се запечи и вметнатата чепкалката за заби, не излезе чиста. Извадете го пандишпанот после печење веднаш од плехот, заедно со хартијата за печење и ставете ја на маса.
6. Додека пандишпанот е жежок, со помош на хартијата завиткајте го во форма на ролат од долгата страна. Оставете го на страна да се излади целосно.
7. Кога пандишпанот целосно ќе се излади и ќе биде готов за филување, направете го филот. Изматете ги хоплата, шеќерот во прав, екстрактот од ванила и солта во голем сад. Во изматениот шлаг додадете го маскарпонето и изматете убаво. Ако го правите филот кафеав, додадете и 2 лажици какао крем и изматете. Одвиткајте го пандишпанот внимателно и отстранете ја хартијата за печење. Распоредете го филот рамномерно врз пандишпанот и повторно завиткајте го во форма на ролат. Ставете го во фрижидер најмалку еден час да се стегне.
8. Во меѓувреме припремете го ганашот. Загрејте ја хоплата, додадете го чоколадото и путерот. Измешајте убаво да се соединат убаво сите состојки. Оставете го ганашот да се излади малку на собна температура, па ставете го во замрзнувач за побрзо ладење. После извадете го и изматете го со миксер. Изматете со голема брзина, додека не стани доволно густ за нанесување.
9. За декорација на тортата, користете голем назабен нож и нежно во дијагонала отсечете едно парче околу 8 цм долго. Со малку ганаш, залепете го парчето на поголемиот дел од дрвото. Со преостанатиот чоколаден ганаш, намачкајте врз целата торта, а потоа со вилушка или остар нож, направете шари кои ќе потсеќаат на кора на дрво. Декорирајте по желба. Оставете го колачот во фрижидер убаво да се стегни.

Фотографиите во овој рецепт се авторски фотографии.

Лиценца: Криејтив Комонс - Наведи извор - Некомерцијално - Сподели под исти услови