По одредено време, еве сум да го споделам мојот јубилеен 400-ти рецепт.
Кога ќе дојдат некои состојби во животот што само тој знае да ни ги приреди, најважно е да се остане на нозе.
Во тоа може да помогнат позитивни луѓе, ама и некое место на кое се сака да се навратува зашто има позитивна енергија, на пример место како ова, какво што лично за мене е оваа страница.
Тортава е едноставна, но со омилените вкусови на домашните.
Тесто
Се прават 2 исти теста во округло тавче бр. 26 обложено со пек хартија.
Се матат јајцата и шеќерот додека се добие пенаста смеса.
Се меша брашното, какаото и пецивото со просејување и се додава во матените јајца. Смесата се изедначува со миксерот, се истура во тавата и се пече околу
10 минути во загреана рерна на 200 степени. Двете испечени теста се ладат убаво.
Фил
Од вкупната количина на млеко се одзема малку колку да се раствори прашокот за пудинг. Во остатокот на млекото се става шеќерот, и штом зоврие се вари пудинг. Истиот треба да се излади сосема, не треба да е ниту млак.
Во добро изладениот пудинг се става исечкан путер, се мати до добивање на хомоген крем фил.
Со дел од филот се филува првото тесто, а со остатокот се премачкува второто тесто и страните на тортата.
Шлагот се подготвува според упатството и на тортата се нанесува со готварски шприц. Се декорира со чоколадо и рибизли.

Ги поздравувам сите кои се дел од организацијата на МР и на самата страница, ги поздравувам сите членки - готвачи на странава ... оние кои се дружат со рецептите ... сите ...
Ви благодарам што постоите.

Фотографиите во овој рецепт се авторски фотографии.

Лиценца: Сите права се задржани