Со оваа изворедна руска торта го заокружувам мојот 100-ти рецепт на оваа прекрасна страна. Како што е редот ќе кажам збор два повеќе за мене.
Мојата најголема пасија и интерест се тортите, професионално се заминавав со оваа дејност како слаткар подолго време, а сега со оглед на можностите само за одредени прилики во домашна изведба.
Особено сум вљубена во руските торти и имам голем почит во однос на комплексноста и техниката во нивната изведба, оваа торта ја сметам за ремек дело, а трудот вложен во нејзината изработка е навистина вреден.
Инаку тортата Наполеон ја симболизира победата на руската војска над големиот Наполеон во 19-век за време на Патриотската војна. И до ден денес ова торта е една од најпознатите торти во Руската кујна, а јас ја избрав токму неа за да го прославам мојот прв јубилеј овде.

Со зачленувањето на оваа страна научив многу од вас, особено се радувам на дружбата овде и радоста што ми ја носи секој споделен и прочитан рецепт. Се надевам на уште многу заеднички дружби и меѓусебна инспирација.

Според мене тајната состојка на секое добро зготвено јадење е љубовта спрема состојките со кои се готви и љубовта кон луѓето за кои е наменето. Затоа секогаш гответе со љубов!

Подготовка

- Во помал сад ја мешаме ладната вода и оцетот. Јајцето и солта ги матиме со вилушка и ги додаваме во садот со водата и оцетот.
- Во поголем сад или процесор за храна го ставаме брашното и путерот исецкан на коцки и месиме или миксираме се додека не добиеме ситни трошки. Полека ги додадаме течните состојки и месеме нелепливо тесто на набрашнета површина. Работиме побрзо бидејќи путерот не смее да се стопи.
- Тестото го делиме на 12 дела и секој дел го замотуваме во фолија и го ставаме во фрижидер да одмара 1 1/2 до 2 часа.
- Додека тестото одмара подгответе го филот. Во сад ставете ги жолчките, шеќерот и 50мл. од млекото и изматете ги со миксер. Потоа додадете го брашното и уште 50-тина мл. од млекото и изматете добро за да нема грутчиња. Преостанатото млеко загрејте го до вриење, дел од него сипете во смесата со јајцата и мешајте со жица постојано. Вратете ја смесата во млекото и варете на умерена температура околу 10 минути или се додека не се згусни кремата.
- Зготвениот фил оладете го целосно, покриен со фолија. Омекнатиот путер го миксираме се додека не побели, а потоа го додаваме оладениот крем и соединуваме до мазна крема.
- Рерната ја загреваме на 200-225Ц. Секој дел од тестото го развлекуваме со сукало помеѓу две хартии за печење во дијаметар од 26цм. Потоа земаме чинија со пречник 24цм и со нож сечеме круг. Кората ја боцкаме со вилушка и ја печеме заедно со остатокот од кората, се додека не зарумени околу 5 минути.
- Секоја кора ја премачкуваме со 3 лажици од филот и ги редиме една над друга. За да не ви се мрдаат корите може да ставите калап за торта. Гледајте да ви остане малку фил за да ги премачкате страните од тортата и последната кора.
- Остатокот од корите го дробиме и со добиените трошки ја украсуваме цела торта.
- Тортата ја оставаме 12 часа на собна температура, а потоа ја ставаме во фрижидер 2 дена да одседи за да се оформат вкусовите и корите да омекнат.

Напомена
Вкусот најмногу ме потсетува на кроасани полнети со ванила фил.

Фотографиите во овој рецепт се авторски фотографии.

Лиценца: Криејтив Комонс - Наведи извор - Некомерцијално - Сподели под исти услови