Торта со малини и чоколадо
Состојки
- За пандишпан
- 100 гр брашно
- 1 лажичка пециво
- 1/4 лажичка сода бикарбона
- 1 полна лажица чоколадо во прав
- 1 ванилин шеќер
- 115 гр шеќер
- 70 мл масло
- 100 мл млеко
- 1 лажица кисела павлака
- 1 јајце
- 70 гр сечкана чоколада
- Фил од малини
- 250 гр малини
- 1 малина пудинг
- 20 гр густин
- 4 лажици шеќер
- 40 гр путер
- Чоколаден крем фил
- 250 гр маскарпоне
- 150 мл слатка павлака
- 100 гр чоколадо со 40 % какао
- 1/2 лажичка ванила арома
Подготовка
Неодолива кремаста чоколадна торта со малинаст вкус...И повторно инспирирана од тековниот натпревар, а со преубав повод, ја создадов оваа убавина за непце.
Тортава ја подготвив за јубилејниот 20-ти роденден на средниот син...
Подготовка на пандишпан
Ги соединуваме сите суви состојки, па го додаваме јајцето и мокрите состојки и соединуваме со миксер. На крајот го додаваме сечканото чоколадо. Смесата ја распоредуваме во тава за чискејк или тава со обрач, која претходно сме ја намрсиле и набрашниле(место брашно може какао). Печеме на 200 степени околу 12-15 минути, во зависност како ни пече рерната. Ја оставаме да се излади, го отстрануваме врвот па ја сечеме на два дела во хоризонтала. Долниот дел го ставаме пак во тавата и 2/3 од филот од малини распоредуваме врз него. Остатокот од филот го ставаме врз вториот дел кој ќе го оставиме на страна. Филот од малини треба да ни е топол кога ќе го распоредуваме врз пандишпанот.
Подготовка на фил со малини
Малините ги блендираме па ги процедуваме низ сито или газа. Ги ставаме во сад за мерење и додаваме вода, вкупно да имаме 400 мл малина со течност. Поголемиот дел го ставаме да врие заедно со шеќерот, а во остатокот раствораме пудинг и густин. Кога смесата ќе почне да врие го додаваме пудингот и мешаме до згуснување.
На крајот го тргаме тенџерето и растопуваме путер. Малинастиот крем пудинг ни е подготвен.
Подготовка на чоколаден крем фил
Слатката павлака ја загреваме до вриење, па го додаваме чоколадото да се растопи. Оставаме да излади па во него го ставаме маскарпонето и соединуваме со миксер. Чоколадниот крем го распоредуваме врз филот од малини, поклопуваме со втор дел пандишпан со фил од малини и на крајот повторно со чоколадниот фил.
Тортата ја декорираме со рендано бело и црно чоколадо и свежи малини.
Забелешка
Во чоколадниот фил може да додадете шеќер во прав, ама тоа во случај да сакате тортата да ви биде поблага, што во мој случај не беше потребно. Тортата е умерено блага и многу кремаста.