Солени стапчиња со сусам
Состојки
- 200гр бело брашно
- 100гр несолена урда или рикота
- 1/2 лажичка оцет
- 2 лажици маслиново масло
- 75мл млеко
- 1 лажичка сол (или по желба)
- 1/2 кесичка пециво
- За премачкување
- 3-4 лажици млеко
- по потреба сусам
Подготовка
Вклучете ја рерната да се загрева на 180 степени. Ставете хартија за печење во плехот од рерната. Во еден длабок сад ставете ги сите состојки за тестото и со неколку зафати замесете го. Не треба долго да се меси, штом видите дека почнува да се лепи за рацете готово е за оформување на стапчињата.
Од тестото одвојувајте парченца со тежина од 15гр и оформете ги во долги тенки прачки со дебелина колку еден прст. Редете ги во плехот. Откако сите сте ги оформиле, премачкајте ги со млеко и посипете обилно со сусам. Јас сусамот го ставам во широк сад, па стапчињата ги ставам со премачканата страна во сусамот.
Се печат околу 20 минути во зависност од рерната. Готови се кога ќе поруменат. Од оваа количина состојки мене ми излегоа 25 стапчиња.