Шеќерна торта со карамел фил и кроасани
Состојки
- Голем пандишпан
- 6 белки
- 6 лажици шеќер
- 2 полни лажици брашно
- 3 лажици мелени ореви
- половина пакетче пециво
- 60 гр. чоколадни трошки
- Мал пандишпан
- 4 белки
- 4 лажици шеќер
- 2 лажици брашно
- половина пакетче пециво
- 40 гр. чоколадни трошки
- 2 лажици мелени ореви
- Крем
- 4 пудинзи од ванила
- 25 лажици шеќер
- 10 жолчки
- 1300 мл. млеко
- 400 гр. маргарин
- Други состојки
- 2 големи пакувања мини кроасани
- 1 мало пакување мини кроасани
- 400 гр. бисквити
- 500 мл. слатка павлака
Подготовка
За подготовка на пандишпаните најпрво се матат белките и шеќерот, а потоа се додаваат останатите состојки и убаво се меша. Малиот се пече во тава бр. 24, а големиот пандишпан во тава бр. 36.
За подготовка на кремот најпрво се карамелизира шеќерот. Откако ќе се добие убава боја на карамел, се додава млекото и на тивок оган се вари додека да зоврие и да се соедини со карамелот. Пудинзите се разредуваат со малку млеко (одземено од оние 1300 мл.) и се мешаат со жолчките. Оваа смеса се додава во зовриеното млеко и се меша додека убаво да згусне. Готовиот пудинг се остава да се излади околу 1 час. За побрзо да се излади, потребно е повремено да се промешува.
На страна се мати маргаринот. Лажица по лажица се додава од ладниот пудинг и убаво се мати со миксер додека да се добие посакуваниот крем.
Почнуваме со филување на тортата.
Најдолу се става големиот пандишпан. Над него се премачкува слој од кремот. Над кремот редиме од кроасанчињата додека да се наполни целата површина. Над нив повторно ставаме од кремот. Потоа следуваат бисквитите мацнати во малку млеко со ванила арома. Големиот дел е готов, па следува филувањето на малиот, на истиот начин. Двата дела се остваат неколку часа да се впијат, а потоа се спојуваат и целата торта се премачкува со претходно изматената. Тортата е завршена, а за декорацијата само бидете креативни.