Видео рецепт: Оригинално италијанско Рижото
Состојки
- 1 главица кромид
- 2 чешниња лук
- 1 ловоров лист
- 60 гр. путер
- 4-5 лажици маслиново масло
- 75 гр. пршута
- сол и бибер
- 300 гр. ориз за Рижото
- 250 мл. квалитетно вино
- 300 гр. свеж Вргањ
- китка магдонос
- За БУЈОН ќе ви треба:
- 1 л. вода
- 1 коцка телешки бујон
Фичо ќе направи Рижото со Вргањ, по класичен италијански рецепт.
Подготовка
Чекор 1: Ситно исечкајте ги кромидот и лукот и пропржете ги на маслиново масло и путер. Додадете го ловоровиот лист и пршутата, сол и бибер. Пропржете ги заедно на кратко, да се соединат вкусовите. Додадете го оризот и извадете го ловоровиот лист. Оризот пржете го додека не стане стаклест, да добие сјај.
Додадете го виното и гответе го на средна температура.
Чекор 2: Во сад ставете ја водата, коцката супа и сварете го бујонот.
Чекор 3: Кога ќе забележите дека виното испарило, додадете 1/3 од бујонот и оваа постапка повторете ја уште два пати.
Чекор 4: Исечкајте го Вргањот на парчиња и пропржете го на загреан путер. Вргањот се додава на крај бидејќи ако долго се готви ќе го изгуби мирисот и вкусот.
Чекор 5: Исечкајте го магдоносот и додадете го во Рижотото. Убаво промешајте и Рижотото е готово.
СОВЕТ: Кога ќе го правите овој рецепт нема компромис во состојките за да го добиете совршениот вкус. Можеби ќе ве чини повеќе од обичен ручек, но навистина вреди.