Чоколадно бухтле
Состојки
- Тесто
- 100 гр несквик
- 200 мл топло млеко
- 80 гр путер омекнат на собна температура
- 20 гр свеж квасец
- 2 полни лажици шеќер
- 10 гр ванилен шеќер
- 1 јајце
- прстофат сол
- изрендана кора од 1 портокал
- 400-450 гр брашно
- За полнење
- мармалад од јагоди или кајсии или каков ќе имате
- за премачкување малку путер
Подготовка
Квасецот растворете го со малку млеко и ставете го во сад за месење. Додајте ги останатите состојки освен брашното. Брашното додавајте го постепено и месите додека се добие изедначено и меко тесто.
Секогаш велам брашното да се додава постепено зато што секој тип не е исти и различно прима течност.
Откако убаво ќе го измесите тестото,ставете го во садот, покријте го со проѕирна фолија и крпа и на топло оставете го да гисни додека се дуплира околу 2 часа. Кај мене толку траеше дури се удвои.
Стасаното тесто размесете го и поделете го на 15 топчиња. Секое топче малку развлечете го со сукало, на средината ставете му по 1 лажиче мармалад и цврсто затворете го да не течи мармаладот и повторно направете топче.
Ставајте ги во тава (26) и оставете ги да надојдат уште 1 час. Потоа ставете ги да се печат во загреана рерна на 180 степени околу 35 мин.
Печени премачкајте ги со путер, покријте ги со алу фолија и крпа и оставете ги да оладат.
Послужете ги наросени со шеќер во прав како појадок или вечера со млекце!