Жива чоколадна торта
Состојки
- 250 гр живи лешници
- 250 гр живи бадеми
- 20 урми (киснети 20тина минути)
- 5 лажици какао
- 400 гр живи индиски ореви (киснети околу 4 часа)
- 2 лажици кокосово масло
- 50 мил агаве
- 1 лажица мед
Подготовка
Трагајќи по жива чоколадна торта која ќе ги задоволи вкусовите на сите членови на моето семејство, по неколкукратно експериментирање, дојдов до овој рецепт. Среќна сум што конечно успеав да направам жива торта која нема да е преблага за мој вкус и од која ќе можам да изедам парче со стандардна големина, што до сега не ми се случило со други живи десерти.
1. Лешниците и бадемите се блендираат до најситно, а потоа им се додаваат една лажица какао и искиснетите урми. Се продолжува со блендирање до изедначување на смесата.
2. Сместата се натапкува на калап за торта претходно обложен со фолија и се става во замрзнувач.
3. Индиските ореви се ставаат во блендер со малку вода и се блендираат дури не се добие кремаста смеса. Со добар блендер ви се доволни само неколку минути. По потреба може да додавата вода во процесот на блендирање.
4. Преостанатото какао, агавето, медот и растопеното кокосово масло додајте ги во бленерот и продолжете со блендирање до изедначување на смесата.
5. Кремот прелијте го врз првиот слој и вратете го во замрзнувач додека не се стврдне, а потоа префрлете го во фрижидер.
6. Пред сервирање декорирајте со рендано темно чоколадо, или доколку сакате овој десерт да е сосема жив, може да попрскате со мелен рогач или кокосово брашно.
Доколку сте љубители на многу слатки десерти, слободно зголемете ја количината на засладувачите оти со овие колични на агаве и мед тортата не е воопшто блага.