Посна чорба со зеленчук и печурки (без масло)
Состојки
- 3-4 компири
- 1 корен пашканат
- 1/4 корен целер + 2-3 стебленца
- 200гр. свежи шампињони
- 200гр. грашок
- 3-4 моркови
- 1 главица кромид
- 1 чешне лук
- по вкус сол, бибер, мешан зачин, мајчина душичка, ловоров лист
- 1 лажичка брашно
- 1,5 - 2л. вода
- неколку гранчиња свеж магдонос
Подготовка
Во пресрет на последната недела од постот имам еден супер рецепт за сите оние кои ќе постите без масло. Се надевам ќе ви се допадне.
Погодена и за оние кои немаат многу време преку недела, па слободно може да си направите повеќе и да имате ручек за 2 дена.
1. Зеленчукот измијте го, излупете го, исечете на поголеми парчиња и ставете во сад на оган да се вари. Додадете го ситно сецканиот кромид и печурките исечени на листови. Доколку користите свеж или замрзнат грашок ставете го и него, ако е од конзерва ќе го ставите на крај. Во садот додадете го и ловоровиот лист и лукчето и оставете се заедно да се вари.
2. Кога зеленчукот е сварен извадете ги компирите, морковите, пашканатот и целерот и згмечете со вилушка па вратете ги назад во садот. Зачинете по вкус и оставете повторно да зоврие. Во зависност која густина сте ја добиле од компирите и која густина на чорбата ја сакате, згуснете со малку брашно растворено со малку вода. Мене ми беше потребно 1 мала лажичка брашно.
На крај ставете го ситно сецканиот магдонос, промешајте и исклучете. Малку нека се излади па послужете со свежа салата.
Добар апетит =)