Едноставна посна компир манџа

Подготовка

За младите домаќинки еве еден посен едноставен ручек.

Морковот и кромидот ситно ги сечкаме. Компирот го сечкаме на мали парчиња. Сето ова заедно со грашакот го ставаме да се вари. Кога ќе ја постигне точката на вриење ја намалуваме температурата и го оставаме на потивко да продолжи да се вари (околу половина час). Го пробуваме дали е сварено.
Го тргаме тенџерето на страна и во тава, на масло ставаме ситно сечкан кромид и лук, да се пропржи до застаклување и пуштање на мирис. Ставаме брашно и црвен пипер, мешаме да се соединат и оваа смеса ја истураме во манџата. Ставаме зачин мешан сушен зеленчук и го враќаме тенџерето на оган неколку минути да проврие, да се спојат вкусовите. Ова е првиот начин.
За вториот кој мене ми е повкусен, сечканиот кромид и морковот ги пропржуваме на масло, па ги ставаме компирите и грашокот и тие малку да се пропржат, па сите состојки ги префрламе во тенџере, ги залеваме со вода и ги вариме на оган. Запршката во овој случај ја спремам така што прво го потпржувам брашното на суво, додека да испушти мирис и да излезе влагата од него( внимаваме да не потемни), па го додаваме маслото заедно со лукчето и кромидот, 2-3 минути да се пропржат и да испуштат мирис. Ја ставаме запршката во тенџерето со варениот зеленчук, додаваме зачини и оставаме на тивко да се вари некоја минута.

Во оваа манџа знам да си додадам и буковец, прстофат оригано... Ако не ви е доволно солена од мешаниот сушен зачин, ставете си и сол. Е сега, количеството на вода кое треба да го ставите е некаде околу 1 литар, ама тоа сепак зависи од големината (габаритот кој го зафаќа во тенџерето) на заленчукот кој сте го насечкале. Значи треба да го покрие и да има место за вриење и згуснување при варењето. Инаку од тоа колку брашно ќе ставите во запршката ќе ви зависи и густината на чорбичката. Доколку сакате , можете да ставите и повеќе масло во запршката.

Многу напишав, ама се надевам добро објаснив и дека ќе си направите, вкусен едноставен посен ручек.