96 лиснати кифли за прослава

Подготовка

За секаков вид на прослави ви ги препорачувам овие лиснати кифлиња кои ми се по рецепт на мојата пријателка Горде.

1. Квасецот со малку млеко, 1 лажичка шеќер, 1 лажица брашно, го оставаме да стаса.
2. Јајцата и шеќерот се матат со миксер, како за торта, значи да се зголемат за три пати, да бидат густо изматени и со светло жолта боја, баш како за пандишпан. Млекото го доведуваме до точка на вриење на оган и внимателно, по малку го истураме во јајцата, постојано мешајки со миксерот. Потоа додаваме масло и малку по малку додаваме брашно. Матиме со миксер постојано.
3. Кога ќе се доведе тестото во состојба на згуснување, почнуваме да месиме со раце и го додаваме остатокот од брашното. Неполни 2 кг брашно одат во смесата, ама сепак зависи со каква влажност е брашното. Во главно треба да се добие средно меко тесто кое го оставаме да стаса некои 20 минути, по можност на топло.
4. Откако ќе стаса го размесуваме и го делиме на 8 топки. Секоја топка ја расукуваме, ја мачкаме со путер насекаде, ја засекуваме од страните, па секое полупарче го преклопуваме кон средината и така едно врз друго сите засеци. Го превртуваме топчето и го сукаме внимателно, но не многу тенко.
5. Секој новоформиран круг од тесто го сечеме на 12 триаголници од кои правиме 12 кифли. Оставаме 10 – 15 мин. да стасаат.
Ги печеме во подмачкан со масло или со хартија за печење, плех или тавче, на температура од 200 степени во загреана рерна. Кифлите ги премачкуваме со жолчка и сусам, ама и не мора.

Исто така, ако ја намалите дозата на сол во нив, но сепак мора барем една лажичка сол да ставите, може да ги наполните со каков фил сакате, крем, мармалад...а, може и солена варијанта. Во овие кифли, лиснатици, јас не ставив ништо, ама ставив само 1 ½ лажичка сол, така да вкусот им беше неутрален. Нека си комбинираат домашните со што сакаат, со благо, со солено....Многу членови...не можам на сите да им погодам...