Вегетаријански плескавици
Состојки
- 800 гр. компири
- 400 гр. свежи шампињони
- 150 гр. моркови
- 150 гр. грашок
- 3 лажици презла
- 1 лажица вегета
- малку сол по вкус
- малку мелен црн бибер
- 200-300 мл. зејтин за пржење
- За бешамел смесата
- 70 гр. путер
- 3 лажици брашно
- 250 мл. млеко
- 2 јајца
- 2 лажици рендан пармезан
- За увалкување на плескавиците
- 3 јајца
- 80 гр. брашно
- 80 гр. презла
Подготовка
1. Свежите шампињони откако убаво ќе се измијат, се ставаат да се варат во провриена и посолена вода. Се варат околу 15 минути. Потоа ситно се сечкаат и се пропржуваат во тава на малку масло, колку да омекнат, се додава вегетата.
2. Компирот откако ќе се свари, се лупи и се пасира. Се додава малку сол и црн бибер.
3. Исчистените моркови, заедно со грашокот се варат во малку посолена вода. Откако ќе се сварат морковите се рендаат.
4. Посебно се припрема бешамел смесата. На загреан путер се става 3 лажици брашно, убаво се промеша, се долива млеко и кратко се вари да се добие густа бешамел смеса. Откако малку ќе се олади сместа се додаваат јајцата и пармезанот. Па потоа се додава се останато, пире од компир, шампињоните, морковите, грашокот и презлата. Се убаво се измеша, да се добие еднолична смеса.
5. Од смесата се обликуваат плескавици кои прво ги валкаме во брашно, па во изматените јајца, па на крај во презла.
6. Се пржат на загреан зејтин, да добијат златно румена боја. Се вадат и се ставаат на хартиени салфети за да се впие вишокот мрснотија.
Се служи со кисело млеко, павлака или со таратор салата.