Испечати

Брз тарт од јаболка и мармалад од суво овошје

Брз тарт од јаболка и мармалад од суво овошје

Состојки

  • 1 лист (пола пакување) лиснато тесто
  • 200 гр. суви сливи
  • 1 рака брусница (сушена)
  • 1 рака гоџи бери (сушено)
  • малку аронија (сушена)
  • 2-3 (средно големи) јаболка
  • 1-2 лажици густин
  • По желба цимет, морско оревче, каранфилче

Подготовка

За овој рецепт целата идеја тргна од лиснатото тесто. Бидејќи за лиснатите корпици (што претходно ги објавив) искористив една плочка готово лиснато, а во пакувањето беа две, морав да смислам нешто што набрзина ќе го скоцкам додека се печат корпиците.
И така беше створен овој рецепт...

Мешавината од суви овошја ставете ја во тенџерче и прелејте ја со вода – колку да ги прекрие, за да може потоа да не ги цедите. Додајте една лажица шеќер, цимет, морско оревче и каранфилче. Оставете да врие 5 - 10 минути т.е. додека подомекнат овошјата.
За тоа време расукајте го лиснатото тесто (одмрзнато се разбира) и формирајте го тартот во намастено тавче или специјален калап така што дното ќе биде сосема тенко тесто, а од страните направете подебелка кора за да може да го држи мастрафот да не прелева.
Кога ќе омекнат малку сувите овошја, ставете ги во блендер и изблендирајте за да добиете смеса слична на мармалад. Бидејќи остана малку вода јас не ја исцедив туку заедно со неа ги изблендирав, но знаејќи дека нема долго да треба да се пече, од страв да не ми остане многу течно, додадов и полна лажица густин размешан со малку вода за секој случај. И не згрешив. Tоа во печењето му даде на мармаладот убава густина и структура.
Истурете од смесата со суви овошја врз тестото така што ќе биде полно отприлика до половина на страничната кора (ако ви остане ќе може да си го искористите како намаз за палачинки).
Одозгора наредете тенки парчиња јаболка врз кои може да наросите шеќер и по желба малку цимет.
Печете во загреана рерна на околу 200 степени и барем 5 минути на 180 со вентилатор.

Мала забелешка:
Изборот на овошје не мора да биде баш таа комбинација што јас ја користев...мојава комбинација е производ на моментална достапност на производите по дома, хихи.

Нека ви е на здравје!