Вртени полжавчиња со урда
Состојки
- 200 мл топла вода
- 200 мл топло млеко
- 200 мл масло
- 1 коцка свеж квасец
- 1 лажица шеќер
- 1,5 лажица сол
- 1/2 ќесе прашок за печење
- 300 гр брашно тип 0
- 500 гр брашно тип 400
- 300 гр урда
Подготовка
Ова е најблагодарното тесто кое до сега сум го направила, а случајно излезе од моите експериментирања со брашното за пици тип 0. Добивате толку мазно и фино тесто што можите да направите било каква форма и замисла од него.
Подготовка
1. Растворете го квасецот во водата со шеќерот и една лажица брашно и оставете го да запени.
2. Во длабок сад ставете ги водените состојки, пола од брашното и пецивото. Измешајте и додадете ја солта и постепено остатокот од брашното. Мешавината на овие типови брашно дава совршено тесто за работење.
3. Измесеното тесто покријте го и оставете го на топло да се дуплира. Потоа благо премесете го и поделете го на 20на делови кои ќе ги формирате во топчиња.
4. Секое топче исучете го долгнавесто, најтенко што можите. На едната страна ставете во линија од урдата, а остатокот до другата страна засечете го. Потоа свиткајте го, почнувајќи од филуваниот дел. Завитканата ролна потоа завртете ја во круг во вид на полжав.
5. Премачкајте ги со разматено јајце и печете на 200С, додека не поруменат.