Пица со инчуни и капари
Состојки
- Тесто
- 200гр. брашно
- 1/8 коцка од 25гр. свеж квасец
- 2 лажици маслиново масло
- 1/4 лажиче сол
- по потреба млака вода
- Дополнителни состојки
- неколку лажици густа доматна салса
- по потреба кругови лесно топлив кашкавал
- 1-2 гранчиња суво оригано
- 8 инчуни во маслиново масло
- 10-тина капари во сол
- 10-тина шери домати
- малку маслиново масло
- неколку ливчиња свеж босилек
Подготовка
Идејата за пицата дојде случајно. Имав инчуни и капари што требаше да се дотрошат, па решив да ги искористам за подготовка на пица. Убава и вкусна. Како за промена од оние кои често се спремаат, може да пробате.
Подготовка:
1. Од состојките за тесто замесете го тестото. Покријте го садот со најлонска фолија и оставете да стасува 2 часа.
2. На набрашнета површина со раце оформете ја пицата и префрлете ја во плех. Нанесете ја доматната салса и изронете го ориганото. Наредете ги круговите кашкавал, инчуните (претходно измиени под млаз вода и исушени). Ставете ги шери доматите, исечени на кругови и попрскајте со малку маслиново масло. Може да ги ставите и измиените капари, но јас преферирам да ги ставам после печењето.
3. Печете во загреана рерна на 200 степени, 20 минути. Послужете ја со ливчиња босилек .