Испечати

Јафа торта, без печење со два фила

Јафа торта, без печење со два фила

Состојки

  • Фил
  • 500 мл млеко
  • 6 лажици брашно
  • 5 лажици шеќер
  • 1 лажиче екстракт од ванила
  • 3 лажици какао крем за во темниот фил
  • 200 г мелени ореви, 1 лажица шеќер и 6-7 лажици врело млеко за во светлиот фил
  • Подлога 2
  • околу 15 јафа кекси (ресана)
  • Глазура
  • 100 г темно чоколадо
  • 150 мл млеко
  • 50 г путер
  • 1 рамна лажица густин
  • Подлога 1
  • 200 г дробени бисквити
  • 50 г растопен путер
  • сок од 1/2 портокал

Подготовка

Тортава си ја направив само за да ги искористам ресаните кои беа потсушени. Јас ете не сум многу мерак на торти, ама оваа торта толку е вкусна, кремаста, сочна, со шмек на портокал и орев, фантазија!
Следен пат ќе си направам стандарден пандишпан и ќе дојде повисока. Во подготовката на крајот ќе ги напишам и состојките за пандишпанот па ваш е изборот што ќе ставите како пандишпан. Рецептот е за помала торта, а ако правите поголема, удвојте го филот. Овој фил исто така може да го користите за секакви торти и колачи - без грешка.

Подготовка:

1. Прво се припрема филот. Измешајте ги шеќерот и просеаното брашно, ставете ги во млекото, додадете ванила, и во тенџере загревајте со постојано мешање како кога ќе правите пудинг. Се меша додека не се згусне смесата, можи да користите и миксер. Оставете да се олади.

2. Потоа поделете го филот на 2 дела. Во едниот дел додадете 3 лажици какао крем и изматете со миксерот. Во другиот дел додадете попарени ореви претходно измешани со шеќерот. Исто изматете со миксерот. Ќе добиете еден светол и еден темен фил.

3. Потоа во кружен калап бр.24, додадете ги искршените бисквити претходно измешани со сокот од портокал и растопениот путер. Натапкајте ја убаво смесата, па нанесете го едниот фил. Наредете одозгора јафа кекси со чоколадниот дел свртен надолу, попрскајте ги со малку млеко, па одозгора нанесете го и другиот фил.

4. Подгответе ја глазурата. Растворете го густинот во ладното млеко убаво да нема грутки, додадете го чоколадото и путерот и загрејте ја смесата убаво. Mешајте додека не се соединат сите состојки и додека не се добие густина на глазура. Ако евентуално ви е прегусто, додадете малку млеко. Веднаш нанесете ја глазурата одозгора врз тортата и ставете ја во фрижидер да се зацврсти убаво.

На здравје.

Забелешка: Ако правите пандишпан, изматете 6 јајца со 6 лажици шеќер, додадете 6 лажици мелени ореви, 1 пециво, 200 мл сок од портокал и 2 лажици брашно. Измешајте убаво и ставете ја смесата да се печe во истиот калап или малку поголем. После печење и ладење, се дели на 2 хоризонтални дела и се филува. Вака е оригиналниот рецепт за орев торта со 2 фила.