Декоративни велигденски плетенки
Состојки
- 1 пакетче сув квасец
- 1 полна шола топло млеко (околу 300 мл)
- 70 г омекнат путер
- 1 јајце плус 1 белка
- 4-5 лажици шеќер
- околу 500-550 г брашно
- 1 лажиче махлеб
- 1 жолчка за премачкување
Подготовка
Прекрасни декоративни плетенки, за почеток направив само 2, по едно за децата зашто немав доволно брашно, а дозата е за 4 плетенки. Во едниот крај на плетенката се прави дупка и потоа во неа се става јајце. Изгледаат одлично и имаат прекрасен вкус. Некаде прочитав дека и во Хрватска се прават традиционално за Велигден и се нарекуваат приморски велигденски бебиња, зашто личат на повиени бебиња.
Подготовка:
1. Се раствора квасецот во млекото, се додава шеќерот и се остава 10-тина минути. Се додаваат сите состојки освен путерот и жолчката и се матат со миксер. Брашното се додава постепено. Треба да добиете меко тесто. Потоа го додавате со раката омекнатиот путер и го домесувате тестото. Го оставате еден час да го удвои волуменот.
2. Потоа го делите на 12 парчиња. Земате три парчиња и ги сукате во долгнавести форми околу 15 см долги, ги спојувате сите 3 на едниот крај и плетете плетенка. На другиот крај отворате дупка во плетенката и ставате топче направено од фолија. Постапката ја повторувате и со другите делови.
3. Ги премачкувате со жолчка растворена со малку вода или млеко и ги оставате уште половина час покриени да пораснат.
4. Се ставаат во незагреана рерна да се печат околу половина час на 180 степени. После печење, откако малку ќе подоладат, се отстрануваат фолиите и се ставаат јајца во отворите.
На здравје и среќни празници.