Срце торта без печење(со кроасани и крем банани)
Состојки
- 4 големи кроасани со чоколадно полнење
- 6 парчиња крем банани
- 3-4 чоколатца по ваш избор (кит кат и слично) околу 150 г
- 500 мл крем за готвење (неутрален)
- 200 г темно чоколадо (120 г за во тортата, 80 г за глазура)
- 100 г путер (пола во тортата, пола за глазурата)
- шлаг за декорација или по ваш избор
Подготовка
Слична ваква торта направив пред една недела кога ги згрешив мафините на ќерка ми за роденденот- прикажана на последната слика). Тогаш наместо кроасани, измешав се со издробените мафини и добив прекрасна и превкусна торта која ја изедовме за 2 дена и ми побараа дома пак да ја направам. Решив овој пат да ја направам со кроасани. Крем бананите даваат преубав вкус, а може да се стават и ресани, ама тоа во следна прилика.
1. Припремата е наједноставна што може, се сечат на парчиња кроасаните, крем бананите и чоколатцата и се ставаат во подлабок сад.
2. Се загрева кремот за готвење, се додава 120 г чоколадо и путерот, се меша до целосно растопување на чоколадото. Кремот се прелива врз исечканата смеса од кроасани и чоколатца, се меша убаво. Потоа во калапот срце обложен со најлон фолија, се истура целата смеса, се порамнува и се става во фрижидер неколку часа убаво да се излади и да се стврдне. Пред да се додаде глазурата, тортата се превртува на чинија за сервирање и се отстранува фолијата.
3. Потоа се става глазурата од растопено чоколадо и путер. Се остава да се олади, па одозгора се декорира по желба. Јас декорирав со бело чоколадо и со шлаг во кој додадов прехранбена црвена боја.
Тортата е превкусна, мажот ми ја обожава.