Торта со бисквити, портокал и чоколадо (без печење)
Состојки
- Основа
- 300 гр мелени бисквити
- 150 гр стопен путер
- 120 мл сок од портокал
- 1 ванила
- Прв фил
- 300 гр квалитетно црно чоколадо
- 300 мл слатка павлака
- 50 гр мелени лешници
- Втор фил
- 200 мл слатка павлака
- 250 гр млечно чоколадо
- 50 гр мелена плазма
- 1 лажица изрендана кора од портокал
Подготовка
Совршено вкусна торта која брзо се прави, освен времето кое треба да се стегне.
Рецептот ви го напишав оригинал, онака како што го најдов, а во постапката ќе кажам кои измени јас ги направив.
Долниот дел, основата, останува иста, мелените бисквити ја мешаме со сокот од портокал, путерот и ванилата. Обрач со пречник од 22 цм ставаме врз некој тањир и ја втиснуваме рамномерно смесата по целата површина.
За првиот фил, јас наместо лешници ставив 100 гр мелени ореви и ставив околу педесетина гр шеќер во прав. Чоколадото и павлаката се загреваат додека се стопи чоколадото и во него ги ставив оревите и шеќерот, убаво се меша и филот се истура врз првата смеса. Ставете го во фрижидер да се олади и стегне.
За вториот фил, загрејте ја павлаката, ставете го чоколадото, јас овде ставив млечно чоколадо со дробени лешници, додајте ја кората од портокал и бисквитите, промешајте убави и турете ја смесата најгоре. Во фрижидер додека убаво да се стегне, јас ја оставив преку ноќ.
Толку е постапката, многу брзо и едноставно, а добивате многу убави вкусови.