Испечати

Мафини од карфиол и пилешки гради

Мафини од карфиол и пилешки гради

Состојки

  • 400 гр замрзнат карфиол
  • 300 гр пилешки гради, без коски и кожа
  • 2 средно големи јајца
  • 1 лажица маслиново масло
  • по вкус зачини (сол, бибер, влашец, лук во прав..)

Подготовка

Животните, поточно здравствените прилики ме натераа да почнам малку повеќе да експериментирам во кујна, создавајќи јадења со мала количина на јаглени хидрати. Еден од тие експерименти се и овие мафини од карфиол и пилешки гради.

Нивната подготовка е мошне брза и едноставна, а истите претставуваат вистинско мало гастро доживување.

Пред подготовката, замрзнатиот карфиол оставете го да се одмрзне, а потоа исечкајте го на поситни парченца. Во тава ставете маслиново масло и пржете го карфиолот, додека не му испари водата. Сега додатете ги пилешките гради исечкани на ситни коцки и повторно пржете додека не испари и водата од месото и содржината во тавата не почне да свети и да се лепи за дното. Оставете да се излади и во изладените карфиол и пилешко, додадете ги изматените јајца и зачините. Јас од зачини користам: сол, бибер, лук влашец и лук во прав, а вие можете да ги зачините со зачини по ваша желба.

Во калап за мафини, ставете хартиени корпички и во секоја корпичка капнете малку масло и со четкичка размачкајте го по корпичката. Потоа во секоја хартиена корпичка ставете по, отприлика 2 преполни супени лажици од смесата.

Печете ги во претходно загреана рерна на 200 Ц, додека не поруменат. Вкусни се и топли и ладни.

Од оваа смеса, ми излегоа 9 мафини. Може да се чуваат во фрижидер, неколку дена, во добро затворен сад.