Празничен леб со суво овошје

Сувото овошје (кајсии, смокви и урми) исечкајте го на коцкички, ставете во длабок сад и додадете сувото грозје и лешниците. Ставете го медот, румот и зачините, убаво измешајте, покријте со капак или фолија и оставете најмалку еден час да отстои.
Млекото заедно со медот и путерот ставете да се загрее додека путерот се стопи. Оставете малку да излади, течноста треба да биде млака. Во еден сад ставете го брашното, солта и сувиот квасец, додадете го млекото и со миксер со спиралните маталки изматете додека да започне тестото да се одвојува од страните од садот. Продолжете со рачно месење уште неколку минути. Ставете го тестото во сад, покријте со крпа и оставете на топло да стасува околу 30 мин.
Кога стасало, додадете го сувото овошје и измесете повторно. Тука мене ми е полесно тестото да го извлечам во кора, го ставам овошјето во средина, преклопувам од сите страни со тесто и започнувам да го месам. Се меси додека целото овошје се спои со тестото.
Долгнавеста модла (димензии ца. 27 * 10 см.) навлажнете ја со малку вода и ставете хартија за печење. Со влажни дланки оформете го тестото во долгнавеста форма. Ставете во модлата, покријте со крпа и оставете на топло да стасува околу 40тина минути. Рерната загрејте ја на 175 степени. Ставете го лебот да се пече вкупно 75-85 минути или во зависност од рерната. Кога ќе зарумени (одприлика после 30 мин. печење) покријте го со фолија и оставете така до крај да се допече. Пред крајот проверете со нож или чепкалка дали е лебот печен.
Оставете убаво да се излади па завиткајте го во фолија. Најдобро да отстои најмалку два дена (најдобро две недели) во ладна просторија (никако фрижидер) за да го развие неговиот богат вкус. Рок на употреба има 1-2 месеци. Пред да послужите, посипете обилно со шеќер во прав.