Испечати

Саблéс со фил од суви смокви и ф´стаци

Саблéс со фил од суви смокви и ф´стаци

Состојки

  • 200гр брашно
  • 100гр мелени бадеми
  • 80гр шеќер во прав
  • 150гр омекнат путер
  • 1 јајце
  • 1 ванилин шеќер
  • Фил
  • 200гр суви смокви
  • 50мл вода
  • 1 лажица мед
  • 50гр фстаци
  • по потреба шеќер во прав за посипување на колачите

Во длабок сад ставете ги сите состојки за тестото и замесете цврсто тесто. Истото ќе се лепи малку за дланките, но не додавајте брашно, такво треба да биде. Завиткајте го во стреч фолија и ставете во фрижидер да отстои 30-тина минути.
За тоа време подгответе го филот. Смоквите исечкајте ги на покрупно, ставете ги во едно мало тенџере и додадете медот и водата. Ставете да се вари. Откога ќе почне да врие намалете ја температурата на ниска, поклопете со капак и оставете така да крчкаат 5 минути. Оставете малку да се оладат, па со штабен миксер или во сецко измиксајте ги да добиете смеса налик на паста. Додадете ги ф'стаците (сечкани или цели) и убаво измешајте ја смесата. Поделете ја на два дела.
Работната површина убаво набрашнете ја. Тестото поделете го на два еднакви дела и од секој дел развлечете долга, правоаголна кора. На пошироката страна распоредете го едниот дел од филот и завиткајте цврст ролат. Со раце оформете колку можете да добиете четвртаста форма на ролатот. Завиткајте во стреч фолија и ставете во фрижидер да отстои половина час. Истото повторете го и со другата кора.
Од секој ролат сечете парчиња со должина од 2-3цм. и редете ги во плех на хартија за печење. Печете ги 20-25 мин. на 160 степени во претходно загреана рерна. Готови се кога одоздола ќе поруменат а одозгора треба да останат светли. Откако ќе се изладат посипете ги со шеќер во прав.
Напомена
Филот трпи и повеќе ф'стаци отколку што е напоменато во рецептов. Доколку го сакате нивниот вкус, слободно дуплирајте ја количината.
При варењето на смоквите може да додадете и 1 лажица сок од портокал, филот така ќе добие освежителна нота.
Уживајте во прекрасниот вкус на колачиве