Торта кикиритка
Состојки
- за тесто
- 5 белки
- 100 гр. шеќер
- 200 гр. кикирики (печени, несолени, мелени)
- 2 лажици брашно
- 1/4 лажичка пециво
- фил со путер од кикирики
- 300 гр. кикирики (печени, несолени)
- 2-2,5 лажици мед
- 2-2,5 лажици светло маслиново масло или сончогледово
- 45 гр. крем шлаг од ванила
- 125 мл. млеко (ладно)
- фил со жолчки
- 5 жолчки
- 100 гр. шеќер во прав
- 50 гр. бело чоколадо (рендано)
- 125 гр. маргарин или путер
- 40 гр. шлаг пена
- 100 мл. млеко (ладно)
- за декорација
- шлаг пена или слатка павлака, сечкани кикирики (несолени), цели кикирики
Подготовка
Тестото со кикирики е од еден мој одамна запишан рецепт и го прилагодив за печење во тава бр. 26. Останатиот состав на тортата е целосно моја идеја.
1. Белките (на собна температура) се бијат со шеќерот, се додаваат сечканите несолени кикирики, брашното и пецивото. Се пече на 180 степени околу 30-тина минути.
2. За тоа време се прави путерот од кикирики. Се блендираат кикириките, се додава медот и маслото, се блендира додека се добие хомогена (со ситни грутчиња) смеса. Доколку е сува смесата по потреба може да се додаде мед или масло. Прашакот за крем шлаг од ванила се бие со ладното млеко и се соединува со путерот од кикирики.
3. Се добива фил кој се премачкува на изладеното тесто, а бидејќи овој фил има убава густина, може и со рака убаво да се доработи по краевите.
4. Жолчките се бијат на пареа со шеќерот во прав, се тргаат на страна, се додава белото чоколадо, и кога ќе се изладат добро се бијат со маргаринот.
Се бие погуст шлаг со ладното млеко, се соединува со претходниот фил од жолчки и маргарин и се премачкува врз филот со путер од кикирики.
5. Се бие шлаг пена или слатка павлака и тортата се украсува по желба, се посипува со сечкани и цели кикирики. Се лади во фрижидер. Пробајте и уживајте.
И да не заборавам дека автор на името на тортава е малата ми ќерка Ивана.