Бургери од булгур
Состојки
- 2 шољи мелен булгур
- 6 шољи вода
- 1 лажичка сол
- 1 тиквичка
- 1 поголем морков
- 2 млади кромитчиња
- 2 чешниња лук
- 1 јајце
- 2 лажици зејтин
- 1 лажица мешан сув зачин
- 4 лажици лебни трошки
- 1 шоља - 150мл.
Подготовка
Ставете водата да се вари и додадете солта. Откако ќе зоврие ставете го булгурот и варете на умерена температура. Откако и тој ќе зоврие варете го со постојано мешање додека да ја впие целата вода (околу 3-4 минути). Оставете да се излади.
Тиквичката излупете ја и изрендајте ја на крупната страна од рендето. Ставете во цедалка убаво да се исцеди. Морковот исто изрендајте го на крупно. Кромитчињата исечкајте ги ситно, а лукот поминете го низ преса за лук.
Откако булгурот убаво се изладил ставете ги сите состојки и замесете смеса како за плескавици.
Со влажни или намастени раце земајте од смесата и формирајте плескавици, па пржете ги во врел зејтин. Оставете ги на кујнска хартија да се исцеди вишокот од маснотија и послужете ги топли со прилог по ваша желба.
Јас користев темен, мелен булгур (од црвена пченица), а секако дека може да се користи и од другиот, светлиот булгур.
Бургерите правете ги повисоки за полесно да можете да ги вртите при пржењето, инаку може да ви се искршат, распаднат.
Од оваа смеса мене ми излегоа 12 бургери.