Турско пециво со суви домати и маслинки
Состојки
- за тесто
- 500 гр брашно
- 200 мл течен јогурт (или маштеница)
- 100 мл топла вода
- 50 мл маслиново масло
- 1 белка
- 20 гр свеж квасец (или 7 гр. сув)
- 1 лажиче сол
- 1 лажиче шеќер
- за фил
- 150 гр исецкани црни маслинки, сушен домат
- 150 гр моцарела (или друго сирење кое се топи)
- по вкус лук во прав
- 60 гр растопен путер
- за премачкување
- 1 жолчка
- по желба сусам, лупен сончоглед, ленено семе, ким
Подготовка
Едни убави турски кифлички кои дефинитивно влегоа во моето редовно мени, со вкус и мирис кој ги задоволува сите сетила. Подготовката оди вака
Во топлата вода со една лажичка шеќер и малку брашно се остава квасецот да се активира. Во подлабок сад се става брашно, сол, изматена белка, маслиново масло и активираниот квасец и со малку загреаниот јогурт се замесува убаво меко тесто.
Тестото се премачкува со маслиново масло и се остава да го удвои волуменот и да нарасне половина час.
Во меѓувреме се припрема полнежот за пецивата. Ситно се сецкаат маслинките, сирењето ( јас ставив кашкавал овој пат) и сушените домати. Се зачинува со лук во пра и убаво се промешува.
Стасаното тесто се размесува уште еднаш и се дели на 12 топчиња. Од секое топче се развлекува правоаголник кој се премачкува со растопен путер. Се става од филот и се витка како потковица ( види помошни фотографии). Пецивата се оставаат уште половина час да нараснат. Се премачкуваат со разматена жолчка и се наросуваат со семиња по желба (сусам, лупен сончоглед, ленено семе, ким). Врз секое од нив се става мало парченце путер и се печат на 180 степени 20-25 мин. Добар апетит