Ролат од мелено месо со спанаќ
Состојки
- За ролатот
- 500 гр мелено месо
- 1/2 главица рендан кромид
- средина од 1 парче леб
- 4 лажици презла
- 1 јајце
- зачини по вкус црн пипер, сол, мешан сув зачин, буковска пипер, магдонос
- За фил
- 350 гр листови спанаќ
- 3 лажици пармезан или ситно рендан кашкавал
- по вкус мешан зачин, сол, црн пипер и рендано морско оревче
- 1 или 2 свежи тенки колбаси
- За прилог
- 4 поголеми моркови
- 2-3 лажици путер
- по вкус мешан зачин, сол и црн пипер
Подготовка
Подготовка на ролатот
Во сад ставете го месото и останатите состојки. Додајте ги зачините по вкус и смесата убаво измесете ја. Оставете ја да отстои, а за тоа време подгответе го филот.
Спанаќот обарете го во зовриена вода потоа исцедете го, оладете го и многу ситно исецкајте го. Додајте го пармезанот или кашкавалот, зачините по вкус и измешајте.
Колбасите ставете ги во загреана тава, избоцкајте ги со чепкалка и малку запржете ги колку да излезе водата и мрснотијата што е пуштаат.
Се зема месото и на хартија за печење со малку масло направете правоаголна форма со должина околу една педа и два прсти( така мерев). Одозгора распоредете го спанаќот и израмнете го а на крајот ставете ги колбасите.
Завиткајте го ролатот и завиткан во хартијата како бомбона ставете го во плехче за печење.
Печете го во загреана рерна на 180 -200 степени околу 1 час или додека добие црвенкаста боја.
Додека се пече подгответе го прилогот.
Морковите излупете ги и исечете ги дијагонално. Сварете ги да омекнат и исцедете ги од водата.
Путерот стопете го и загрејте го во тава. Додајте ги морковите, зачините по вкус и кратко пропржете ги.
Печениот ролат исечете го на парчина и послужете го со приготвените моркови.