Домашен леб со маст и јогурт

Подготовка

Најдобрите финтици во готвењето порано ми ги кажуваа моите другарИ, не другарки. Од кога си ги најдов МоиРецепти, мислев дека нема да има потреба од финтици, се ми е тука запишано, ама влета другар ми Иле со финтица за домашен леб на која не можев да ѝ одолеам.
Финтицата се вика МАСТ. Иако се ставаат само 2 лажици, тестотo е помеко и посочно подолго време.
Кога решив дека ќе додадам маст, имавме и јогрут по дома, па како течност го додадов јогуртот и шмековите ни дојдоа таман за правење тупан=))

Користиме најчесто наше домашно интегрално пченично, ржано или јачменово брашно мелено на воденица, ретко користиме бело, но соодност е истиот. (здраво теофаниија!!) =))
Доколку користите интегрално брашно имајте на ум дека малку поспоро стасува од белото, а и не треба толку да се меси за да не биде збиено. Пoмалку месење, подолго стасување.
Можете слободно да мешате интегрално брашно со бело во сооднос по желба, 50-50 или помалку бело, повеќе интегрално.
Лепчето на сликата е со 800грама ржано и 200 грама бело брашно. Ржаното брашно не ни е просеано, па има многу трици во него и потешко стасува, затоа додадов малку бело.

Сувите состојки се мешаат, квасецот се раствара во јогуртот или водата, не се чека да стаса (да се активира), течноста се додава во брашното и се замесува меко тесто.
Поклопено се остава да стаса и готово е за окулу 40ина мин. Повторно се замесува, но овој пат се дели на делови и се става во калапите за векни на Делимано да стаса уште еднаш.
Се пече во загреана рерна на 200 степени 20ина минути, па уште 20ина минути на 180.