Посен минт сладолед - After Eight

Подготовка

Двете основни состојки за посен сладолед се замрзнато овошке или кокосово млеко. За овошните веќе има неколку рецепти па затоа се одлучив да го пробам овој втор начин. Сладоледот е толку кремаст што нема да ви се верува дека е посен. Комбинации и вкусови може да правите колку сакате, нема да погрешите ... едноставно сладоледот е одличен.
Афтер Ејт чоколатцата верувам ви се познати на сите. Ми послужија како инспирација за денешниот сладолед. Како комбинација состојките одлично се надополнуваат и си одговараат.

1. Користев кокосов крем, но можете и со кокосово млеко. Се става во сад на пареа со шеќерот и ванилата и се остава постепено да се загрее за да се растопи шеќерот.
Ментол арома немав, но се снајдов =) Може да користите било какви ментол тврди бонбони, само ставете ги во сад на оган со 50мл. вода и мешајте се додека не се растопат. Потоа додадете ја течноста во другиот сад со млекото. Доколку користите ментол арома можеби ќе треба да додадете уште малку шеќер. Со оглед дека и самите бонбони имаат шеќер во нив, 2 лажици ми беа доволно.
2. Кога шеќерот ќе се растопи тргнете го садот и оставете да се лади на собна температура. По правило изладената смеса се става во апарат за сладолед некои си 20тина мин., а потоа во замрзнувач. Јас немам апарат па отиде директно во замрзнувач.
3. За преливот ставете ги сите состојки во сад на оган и мешајте додека не се растопи шеќерот и смесата малку не се згусне.
Прелијте преку сладоледот или ставете во помал сад на страна.

Добар апетит =)