Чоколадна торта со вишни
Состојки
- тесто
- 3 јајца
- 4 лажици шеќер
- 125 гр растопен маргарин
- 150 мл јогурт
- 150 гр брашно
- 1 лажиче пециво
- 1 лажица какао
- фил
- 300 гр вишни од компот
- 300 -350 мл сок од компотот од вишни
- 1 пудинг со вкус на чоколадо
- 100 гр црно чоколадо
- 2 лажици шеќер
- 1 лажица густин
- 2 кеси бел шлаг
- 200 мл млеко
Подготовка
Оваа торта драги мои пријатели ја правев пред 10 дена со повод за мојот постар 22 годишен син, за зборовите -мамо, готово јас исчистив се, ми остана уште Дипломската работа (инаку студираше на Државниот универзитет на Економски факултет- Скопје).
Па ете набрзина за тој ден да го почестам семејството со нешто вкусно, слатко се одлучив за оваа торта.
А на крај се надевам дека ќе направам вистинска славеничка торта.
Е ај сега како ја правев.
Прво се матат јајцата со шеќерот, се додаваат растопениот маргарин, јогуртот, какаото, пецивото, брашното.
Лесно се промешува и се истура смесата во силиконски калап да се печи.
Нека се излади убаво.
Сега внимателно одсечете го капакот на тортата и со лажиче извадете од внатрешноста.
Добиеното тесто изронете го низ прсти.
Во тенџере на оган ставете го сокот од компот, шеќерот, пудингот, густинот и варете до згуснување.
Додека е топло додадете го чоколадото да се растопи а потоа додадете ги и исчистените вишни.
Со вака добиениот фил наполнете ја тортата.
Сега се мати шлагот и се нанесува врз филот.
Обилно се наросува тортата со ронките тесто.
Многу вкусна и лесна торта, мана е што не е многу голема и нема за наредниот ден.