Крем салата од печурки и туна
Состојки
- една голема конзерва туна во парчиња
- 200г свежи шампињони
- 5-6 кисели краставички
- два грста златна мешавина (пченка, грашок, морков)
- четвртина главица кромид
- 100мл бело вино
- 200мл кисела павлака
- лажица сусам
- по потреба/желба мешан сув зачин, бибер
Подготовка
Ова ни е една од омилените крем салати и многу често ја приготвувам, не одзема многу време.
Туната се цеди од маслото или водата и се става во длабок сад. Се полева со сок од лимон и се додава ситно исецканиот кромид, оригано и коријандер. По желба може и свежо мелен црн пипер. Убаво се меша и се остава во фрижидер покриена со фолија.
Печурките убаво се мијат и се сецкаат на тенки ливчиња. Во тава за пржење се топи путер и се додаваат печурките да се пропржат. Се зачинуваат по желба, јас ставам мешан сув зачин, црн бибер и оригано. Кога ќе испари водата, се додава белото вино и се динстаат во него додека не испари. Потоа се додава една лажица сусам и се пропржува заедно со печурките.
Изладените печурки се мешаат со туната, се додаваат златната мешавина претходно обарена, ситно исецканите кисели краставички и киселата павлака и се меша убаво, да се добие хомогена смеса.
Се остава во фрижидер убаво да се излади.
Оваа салата може да се приготвува за различни слави и свечености, може да се служи вака, но со неа може да се полнат и пирошки од палачинки, тортиљи и слично.