Зелник од готови кори со компири и мелено месо
Состојки
- 1 кг компири
- 100 г кромид
- 300 г мелено месо (јас користев телешко)
- 1/2 лажичка мелен црн пипер
- 2 лажички мешан сув зачин
- 500 г кори за пита
- 150 мл масло
- 150 мл вода
- малку сол
Подготовка
Овој рецепт го најдов на интернет и решив да го пробам. Навистина не може да се забележи дека е зелникот е направен од готови кори. Вкусот е ист како бурек. Пробајте го.
Компирите се мијат, се лупат и се рендаат. Потоа им се додава нарендан кромид, мелениот црн пипер, мешаниот сув зачин, меленото месо и се добро се промешува.
Се става една кора и се попрскува со масло, врз неа се става втора кора и на неа се распоредува од филот со компири и мелено месо. Врз филот се попрскува масло и се витка. Постапката се повторува со сите кори.
Се премачкува округла тепсија за печење и во неа се редат корите во форма на зелник. Се пече во загреана рерна на 200 степени, околу 30 минути.
Водата посолете ја, ставете ја да зоврие и со неа прелијте го печениот зелник. Вратете го зелникот уште неколку минути во рерна да испари водата.
Добар апетит!