Шарена торта
Состојки
- Кафеав пандишпан
- 3 средни јајца
- 9 лажици шеќер
- 1 ванила
- 9 лажици масло
- 7 рамни лажици брашно
- 1/2 прашак за пециво
- 2 лажици какао
- Жолт пандишпан
- 3 средни јајца
- 9 лажици шеќер
- 1 ванила
- 9 лажици масло
- 9 рамни лажици брашно
- 1/2 прашак за пециво
- Фил
- 3 јајца
- 10 лажици шеќер
- 200 гр путер на собна температура
- 100 гр чоколада за готвење
- 3 полни лажици нутела или еурокрем
- 50 гр шеќер во прав
- За прскање на пандишпанот
- 200 мл млеко
Подготовка
Подготовка на кафеавиот пандишпан
Во еден сад се ставаат јајцата, шеќерот, ванилата и се матат со миксер додека се добие светла кремаста смеса. Се додава маслото и повторно малку се изматува.
На крај се додаваат брашното, какаото, пецивото и се мешаат со жица да се изедначат.
Сега се подготвува и жолтиот пандишпан
Во друг сад се ставаат јајцата, шеќерот и ванилата и се матат додека се добие светла кремаста смеса. Се додава маслото и повторно малку се изматува. Се додава брашното, пецивото и се мешаат со жица да се изедначат.
Плехот се мачка со путер и се набрашнува или се става хартија за печење. Се истура кафеавата смеса, се рамни и се става да се печи во загреана рерна на 200 степени околу 8-9 минути потоа се вади од рерна се става жолтата смеса, се рамни и се допекува уште 8-9 минути.
Печениот пандишпан се остава да олади и се подготвува филот.
Во еден сад се ставаат јајцата и шеќерот и се матат со миксер. Потоа се ставаат да се варат на пареа околу 10-15 минути, се додава чоколадата искршена на коцки и се меша додека целата се стопи и се изеднаци со јајцата.
Се трга на страна и се остава да олади.
Путерот се мати со шеќерот во прав, се додава изладената смеса од јајца и чоколада се мати и на крај се додава нутелата и убаво се до изматува да се изедначи. Во филот по желба можите да ставите и мелени лешници, ореви, рум и сл.
Пандишпанот се сечи на три ленти. Секоја лента се прска со млекото и се филова со филот. Одозгора се украсува со матена слатка павлака или по ваша желба.