Вертикална торта со чоколадо и портокал

Подготовка

Ја правев оваа торта како експеримент за мојот роденден, колку да видам дали можам, а и како вежба за роденденот со гости. Да не пукне брука, знаеш како е =))
Сликата ја најдов на интернет многу одамна и ми остана како еден вид на предизвик бидејки торта не сум правела од кога имав 11 години (во превод НИКОГАШ) =))
Ја направив со мали измени бидејки немав време да гланцам и ц-цкам со два пилиштарци и со тренерки ко Бјонсе, нон стоп спуштени на колкови од што ме влечкаат =))

Искрено, на толку непазење, испадна супер. Следниот пат ќе биде ептен поубава на изглед, а со вкусовите и боите може да се игра до бесконечност. Најважно во оваа торта е начинот на филување.

Можете да си користите каков сакате пандишпан, оној кој што вам ви е најомилен, а истото важи и за филот.

Јас ќе ја објаснам постапката за оние состоки кои горе ги запишав, па следниот пат ќе дополнам со фотографија и со новиот фил.

Прво се приготвува филот, за да има време да се олади
Од млекото се одзема половина шоља и во него се раствара нишестето, а остатокот од млекото се вари на огин. Кога млекото ќе биде пред вриење се додава чоколадото искршено на коцки и убаво се меша да се растопи. Ќе внимавате убаво да се растопи чоколадото, да не остануваат грутчиња бидејки следен чекор е додавање на нишестето, а нишестето ќе ја згусне смесата и грутчињата ќе останат.

Од како ќе се додаде нишестето, убаво се меша да згусне. Ќе се добие смеса која е потполно иста како пудинг. Доколку сакате можете да направите и обичен пудинг, но направете го да биде погуст од вообичаено за да можете да го нанесете како фил или додадете пенесто разматен маргарин/путер од прилика 150-200гр.
Јас овде не додадов бидејки ја правев тортата за да можат и пилиштарците да ја јадат.

Тесто
Петте јајца на собна температура убаво се матат со петте лажици шеќер, да згусне и да нарасне. Се трга миксерот и се додаваат петте лажици брашно, но се мешаат со лажица, не со миксер. Кога убаво ќе се соедини смесата се сипа во плехче обложено со хартија за печење и се пече 5 мин на 250 степени во загреана рерна.
Јас печев во ростерот на делимано (како и секогаш) и нема утка, не лепи, лесно е за работа и за одржување.

Премаз
Слатко од кора од портокал по рецептот на Соња
http://moirecepti.mk/post/%D1%81%D0%BB%D0%B0%D1%82%D0%BA%D0%BE-%D0%BE%D0%B4-%D0%BA%D0%BE%D1%80%D0%B0-%D0%BE%D0%B4-%D0%BF%D0%BE%D1%80%D1%82%D0%BE%D0%BA%D0%B0%D0%BB

Е сега доаѓа интересниот дел

Пандишпанот се сече на ленти по должина. Во зависност од тоа колку висока сакате да ви биде тортата, на толку дебели ленти ќе го пресечете пандишпанот. Јас сакав пониска торта, па исеков 4 ленти.
Со метро ќе измерите од горната страна на пандишпанот, ќе сецнете со нож и истото ќе го направите и од долната страна.
Ова го правите за да се исечат прави парчиња. Од нив зависи формата на тортата.

Го земате првото парче, премачкувате од слаткото со портокали, па над него крем. Го мотате во ролат и го ставате да стои вертикално. Со секој следно исечено парче пандишпан го правите истото во однос на премачкување, но не го мотате, туку само го прилепувате кон крајот од предходното парче и го обмотувате предходното парче (слика).

Се филува тортата од надвор со преостанатиот крем, со шлаг или слатка павлака по желба.

Е сега типс енд трикс
Како што реков, тортата ја правев за да може да ја јадат и пилиштарциве по дома, па затоа е така неиндустриска по состав.
Инаку, кога филот би бил поцврст, како цврсто изматена слатка павлака и сл, формата ќе биде поцврста.
Заради тоа што кремот е мек и парчето е кривата кула во Пиза, а треба да стои самостојно со вертикалните ленти како тортата позади.
Можете да направите и темен пандишпан со светол крем.

Е па, вистинскиот пресек ќе го добиете некаде на почеток на декември кога ќе почнат да доаѓаат гостите. До тогаш, уживајте во органскава торта =))