Ванилици со маст и маргарин
Состојки
- 100гр. маргарин
- 100гр. маст
- 50мл. зејтин
- 3 лажици шеќер во прав
- 1 лажица ванила
- на врв нож сол
- кора и сок од 1 лимон (помал)
- 400-450гр. брашно
- по желба сецкани ореви
- за лепење мармалад
- за валкање шеќер во прав
Подготовка
Еден комбиниран рецепт за ванилици, највеќе за да не се бунат домашните ради количината на маст =)))
Ова е половина доза, излегуваат отприлика 30тина ванилици во зависност од модличката која ќе ја употребите. Сокот од лимон им дава сосем малку киселкаст вкус, но нас ни се допаднаа и така.
Доколку не сте љубители на маст или немате може да се направат и само со маргарин, вкусни се и така.
1. Во подлабок сад ставете ги сите состојки и со рацете замесете меко тесто кое не се лепи, па оставете во фрижидер додека се загрева рерната.
2. На малку набрашнета површина развлечете кора со дебелина од 4-5мм па со модличка вадете форми. Наредете ги на плех обложен со хартија и ставете да се печат во загреана рерна. Треба да ви останат бели. Оставете убаво да се изладат, па лепете по две со мармалад и извалкајте во шеќер во прав.
Добар апетит =)